कोरोना संक्रमित एक महिला बिरामीलाई ताप्लेजुङबाट हेलिकप्टरले बिएन्डसी अस्पतालमा ल्याएको छ।
शुक्रबार साँझ सिम्रिक एयरको हेलिकप्टरले ४४ वर्षीय महिलालाई बिएन्डसीमा ल्याएको हो।
आइसियूसहित भेन्टिलेटरको सहायतामा उपचार गर्नुपर्ने भएपछि आफन्तले काठमाडौंबाट हेलिकप्टर चार्टर्ड गरी ती महिलालाई बिएन्डसीमा ल्याएका हुन्।
‘अहिले साँझबाट उहाँलाई भेन्टिलेटरमा राखेर उपचार थालिएको छ,’ बिएन्डसीका सूचना तथा जनसम्पर्क अधिकारी प्रमिश गिरीले भने।
यो सहित नेपालका विभिन्न ठाउँबाट हालसम्म बिएन्डसीमा २७ जनालाई हेलिकप्टर चार्टर्ड गरी उपचारमा ल्याइएको गिरीले बताए।
गिरीका अनुसार ताप्लेजुङकी ती बिरामीका आफन्तले काठमाडौंबाट सिम्रिक एयरको हेलिकप्टर बोलाएका थिए।
ताप्लेजुङबाट हेलिकप्टरले बिरामीलाई बिएन्डसी ल्याएपछि उपचार थालिएको हो।
