जाजरकोटमा खेत गोड्न गएका दुई जनाको खोलाले बगाएर मृत्यु भएको छ।
कुशे गाउँपालिका-५ दम्दालाका ४८ वर्षीय जितबहादुर थापा र ५६ बर्षका साईमल नेपालीको खोलाले बगाएर मृत्यु भएको हो।
साउन २४ गते गाउँभन्दा तलको खेत गोड्न गएका उनीहरुको शव साउन २८ गते फेला परेको जिल्ला प्रहरी कार्यालय जाजरकोटले जनाएको छ।
खेत गोड्न उनीहरू गएकै दिन बाटुले खोलामा बगेको जिल्ला प्रहरी कार्यालय जाजरकोटका प्रमुख प्रहरी नायब उपरीक्षक मधुकुमार थापाले जानकारी दिए।
उनका अनुसार २४ गतेदेखि हराएका उनीहरुको आफन्तले प्रहरीलाई जानकारी नगराएर नै खोजी गरेका थिए।
‘उहाँहरू हराएपछि आफन्तले प्रहरीलाई खबर गर्नुभएन,’ डिएसपी थापाले भने, ‘भेटिएपछि पनि थाह दिनुभएको थिएन, प्रहरीले सामाजिक सञ्जालबाट थाह पाएर घटनास्थल पुगेको हो।’
घटनास्थलबाट प्रहरीले ती शवहरू जिल्ला अस्पतालमा ल्याएको थियो। पोष्टमार्टम गरेर आज सम्बन्धित गाउँमा लिन लागिएको उनले जानकारी दिए।
डिएसपी थापाका अनुसार उनीहरूको शव केही भाग सडेको अवस्थामा भेटिएको थियो। शवको प्रकृति हेर्दा खोलाले नै बगाएको देखिए पनि यसबारे थप अनुसन्धान भइरहेको डिएसपी थापाले बताए।