वसन्तको सौन्दर्य पस्किरहेका काठमाडौं सहरका बोटवृक्ष (तस्बिरहरू)

नवीनबाबु गुरूङ

काठमाडौं, फागुन २७

तीन–चार दिन भयो, काठमाडौंको आकाश डम्म बादलले ढाकेको छ। न झमझम झरी पर्न सकेको छ, न आकाशमा घाम नै उघारो देखिन्छ। वायुमण्डल पनि धुवाँ र धूलोले ढाकेको छ, सास नै फेर्न कठिन हुने गरी। रूघा–खोकी लगायत मौसमी समस्याले उस्तै ताडित तुल्याएको छ।

यही उच्चाट लाग्दो मौसम चिर्दै काठमाडौंका सडकमा लालित्यको बिस्कुन लगाउने गरी चेरी फुल्न थालेका छन्।

काठमाडौंको लैनचौर, सिनामंगल, भृकुटीमण्डप, नक्साल, लाजिम्पाट आदि क्षेत्रमा ढकमक्क फुलेका चेरी, आरू लगायत मौसमी फूलहरूले वसन्तको शोभा डाकिरहेको प्रतीत हुन्छ।

यी फूलहरूले केही क्षणका लागि भए पनि काठमाडौंको धूलो, धुवाँ, भीडभाड र सवारी साधनको कर्कश ध्वनि बिर्साइदिएका छन्।

मानिसहरू टक्क उभिन्छन्, यही फूललाई पृष्ठभूमिमा राखेर तस्बिर कैद गर्छन् र वसन्तको शोभासँग एकाकार हुन्छन्।

चेरी फूल क्षणिक हुन्छ। हाँगा नै ढाकेर फूलेको केही समयमै झरेर रित्तो भइहाल्छन्। र त, मानिसहरू यसको सौन्दर्यबाट वशिभूत हुन्छन्। सहरी भीडभाडबीच पनि प्रकृतिको सुन्दरता मुस्कुराएको, आफ्नो कोमल स्पर्श छाडेको रूपमा मानिसहरूले बुझ्ने गरेका छन्।

तस्बिरहरूः