नाइमा मोबिलिटी एक्स्पोमा होङ्सी र आर्फक्सका लागि स्टल लिइएको छ। तर दुवै ब्रान्डका गाडी भने एक्स्पोमा राख्न सकिएको छैन।
केरुङबाट रसुवागढी भन्सारतर्फ आउने सडकमा पहिरो र ठूला ढुंगा खसेपछि गाडी नेपाल ल्याउन नसकिएको बिक्रेता कम्पनीहरूले जानकारी गराएका छन्।
आज (मंगलबार)देखि काठमाडौंको भृकुटीमण्डपमा सुरू भएको दोस्रो नाइमा मोबिलिटी एक्स्पोमा यी दुवै नयाँ ब्रान्डका गाडी सार्वजनिक गर्ने तयारी थियो।
त्यसैअनुसार एक्स्पोमा स्टल लिइएको थियो। होङ्सीका गाडी चीनको केरुङसम्म आइपुगेका थिए। तर, केरुङबाट नेपालतर्फ आउने सडकमा पहिरो गएको छ।
सडकमा ठूला ढुंगा पनि खसेका छन्। सडक अवरुद्ध भएपछि गाडी रसुवागढी भन्सारसम्म ल्याउन नसकिएको हो।
एमजीका गाडी नेपालमा बिक्री गर्दै आएको पारामाउन्ट मोटर्सका शिरिष मुरारकाले सडक अवरोधका कारण होङ्सीका गाडी एक्स्पोसम्म ल्याउन नसकिएको जानकारी गराए।
उनका अनुसार गाडी केरुङसम्म आइपुगे पनि त्यहाँबाट नेपाल ल्याउन नसकिएको हो।
होङ्सीका लागि एक्स्पोमा स्टल लिइएको छ। गाडी नआएपछि स्टलमा सवारीसाधन राखेर प्रदर्शन गर्न नसकिएको मुरारकाले बताए।
आर्फक्सका लागि पनि एक्स्पोमा स्टल लिइएको छ।
आर्फक्स लक्ष्मी ग्रुपले नेपालमा ल्याउन लागेको नयाँ ब्रान्ड हो।
लक्ष्मी ग्रुपका निराकर श्रेष्ठले सडक अवरोधका कारण आर्फक्सका गाडी पनि एक्स्पोमा ल्याउन नसकिएको बताए।
आर्फक्सका गाडी पनि केरुङ हुँदै नेपाल ल्याउने तयारी थियो। तर, सडकमा पहिरो र ठूला ढुंगा खसेपछि गाडी ल्याउन नसकिएको श्रेष्ठले जानकारी गराए।
होङ्सी र आर्फक्स दुवै नेपालका लागि नयाँ ब्रान्ड हुन्।
नाइमा मोबिलिटी एक्स्पोमै यी ब्रान्ड सार्वजनिक गर्ने तयारी गरिएको थियो। एक्स्पोमा स्टलसमेत लिइएको थियो।
नाइमा एक्स्पोमा नयाँ ब्रान्ड र नयाँ मोडल सार्वजनिक गर्ने तयारी गरिएको छ। यसपटक ५५ भन्दा बढी ब्रान्ड सहभागी छन्।
४० भन्दा बढी नयाँ मोडल तथा उत्पादन सार्वजनिक गर्ने तयारी छ।
त्यही क्रममा होङ्सी र आर्फक्सका गाडी पनि एक्स्पोमै सार्वजनिक गर्ने योजना बनाइएको थियो।
तर, गाडी ल्याउने बाटोमै अवरोध भएपछि स्टलमा गाडी राख्न नसकिएको हो।
