काठमाडौंको भृकुटीमण्डपमा भएको नाइमा नेपाल मोबिलिटी एक्सपो–२०२६ मा विभिन्न मूल्यका कार प्रदर्शनमा राखिए।
एक्सपोमा १८ लाख रूपैयाँ हाराहारीका साना विद्युतीय कारदेखि झन्डै ३ करोड रूपैयाँ पर्ने प्रिमियम एसयूभीसम्म देखिए।
मूल्यका आधारमा एक्सपोमा प्रदर्शनमा रहेका कारमध्ये सबभन्दा महँगो 'डेन्जा बी५' हो। त्यसपछि आउँछन् 'एमजी मजेस्टर' र 'हुन्डाई आयोनिक९'।
सस्तोमा हेनरी भोल्ट्स मोडल एच, एमजी कोमेट इभी र वुलिङ मिनी इभी छन्।
सबभन्दा महँगा तीन कार
डेन्जा बी५ – २ करोड ९७ लाख रूपैयाँ
बिवाइडीको प्रिमियम ब्रान्ड डेन्जा बी५ एक्सपोको सबभन्दा महँगो कार हो। यो प्लग–इन हाइब्रिड एसयुभी हो।
यसमा १.५ लिटर टर्बो पेट्रोल इन्जिनसँग विद्युतीय मोटर छ। यसको संयुक्त पावर ४२५ किलोवाट र टर्क ७६० एनएम छ।
यसमा ३१.८ किलोवाट आवरको एलएफपी ब्याट्री छ। विद्युतीय मोडमा करिब ९० किलोमिटर र पेट्रोल तथा विद्युतीय प्रणालीको संयुक्त रेन्ज करिब ८५० किलोमिटर रहेको कम्पनीको दाबी छ।
४.९२ मिटर लामो यसमा २२० मिमी ग्राउन्ड क्लियरेन्स छ।
अगाडि र पछाडि भेन्टिलेटेड डिस्क ब्रेक, एबिएस, इबिडी, इलेक्ट्रोनिक स्थिरता नियन्त्रण, हिल डिसेन्ट कन्ट्रोल, एयरब्याग, ३६० डिग्री क्यामरा र एडिएएस जस्ता सुविधा छन्।
एमजी मजेस्टर– २ करोड ५० लाख रूपैयाँ
दोस्रो महँगो कार एमजी मजेस्टर हो। यसमा २.० लिटर ट्विन–टर्बो डिजेल इन्जिन छ, जसले २१५ पिएस पावर र ४७८ एनएम टर्क उत्सर्जन गर्छ। यसमा ८–स्पिड अटोमेटिक गियरबक्स छ।
ठूलो आकारको यो एसयूभीमा विभिन्न ड्राइभिङ मोड, हिल डिसेन्ट कन्ट्रोल जस्ता फिचर छन्।
सुरक्षातर्फ ६ वटा एयरब्याग, एबिएस, इबपडी, इलेक्ट्रोनिक स्थिरता नियन्त्रण, हिल होल्ड र टिपिएमएस छन्। चारै पांग्रामा डिस्क ब्रेक छ।
हुन्डाई आयोनिक९– २ करोड १९ लाख ९६ हजार रूपैयाँ
हुन्डाई आयोनिक९ एक्सपोको तेस्रो महँगो कार हो। यो पूर्ण विद्युतीय एसयूभी हो। यसमा ११०.३ किलोवाट आवरको ब्याट्री छ।
एडब्लुडी भेरियन्टले ३१५ किलोवाट पावर र ७०० एनएम टर्क उत्सर्जन गर्छ। आरडब्लुडी लामो दूरीको संस्करणले ६२० किलोमिटरसम्म रेन्ज दिने निर्माता कम्पनीको दाबी छ।
५.०६ मिटर लामो आयोनिक९ मा ३.१३ मिटरको ह्विलबेस छ। चारै पांग्रामा भेन्टिलेटेड डिस्क ब्रेक, एबिएस, इलेक्ट्रोनिक स्थिरता नियन्त्रण र रिजनरेटिभ ब्रेकिङ छन्।
एयरब्यागसँगै लेन किपिङ असिस्ट, फर्वार्ड कोलिजन अवोइडेन्स र ब्लाइन्ड–स्पट मोनिटरिङजस्ता सुरक्षा सुविधा छन्।
सबभन्दा कम मूल्यका तीन कार
हेनरी भोल्ट्स मोडल एच– १८ लाख ५० हजार रूपैयाँ
हेनरी भोल्ट्स मोडल एच एक्सपोको सबभन्दा सस्तो कार हो। बेस भेरियन्टमा १६.५ किलोवाट आवरको ब्याट्री र ३४ किलोवाटको मोटर छ। यसले ४६ पिएस पावर र १०२ एनएम टर्क उत्सर्जन गर्छ।
यसको रेन्ज करिब २०५ किलोमिटर छ।
चार सिटे यो कारको लम्बाइ ३.३८ मिटर र ग्राउन्ड क्लियरेन्स १६५ मिमी छ। अगाडि डिस्क र पछाडि ड्रम ब्रेक छन्। एबिएस, इबिडी, हिल होल्ड, एयरब्याग, रिभर्स क्यामरा, पार्किङ सेन्सर र आइसोफिक्स उपलब्ध छन्।
एमजी कोमेट इभी– १८ लाख ७५ हजार रूपैयाँ
एमजी कोमेट इभी दोस्रो सस्तो कार हो। १७.३ किलोवाट आवरको ब्याट्री र ३१ किलोवाटको मोटरले ४२ पिएस पावर र ११० एनएम टर्क उत्सर्जन गर्छ।
यसको रेन्ज २३० किलोमिटरसम्म छ।
चार सिटे कोमेटमा अगाडि–पछाडि डिस्क ब्रेक, डुअल एयरब्याग, एबिएस, इबीडी, टिपिएमएस, रियर पार्किङ सेन्सर र आइसोफिक्स छन्।
यसको कम्प्याक्ट आकार सहरी प्रयोगका लागि लक्षित छ।
वुलिङ मिनी इभी– १९ लाख ९९ हजार रूपैयाँ
सस्तो कारको सूचीमा तेस्रो वुलिङ मिनी इभी हो। यसको नियमित मूल्य २० लाख ९९ हजार रूपैयाँ भए पनि एक्सपो अफरमा १ लाख रूपैयाँ छुटपछि १९ लाख ९९ हजार रुपैयाँमा उपलब्ध छ।
यसमा करिब ३० किलोवाटको मोटरले ११० एनएम टर्क उत्सर्जन गर्छ। विभिन्न संस्करणले २०५ देखि ३०१ किलोमिटरसम्म सिएलटिसी रेन्ज दिने बताइएको छ।
अगाडि डिस्क र पछाडि ड्रम ब्रेकसँगै एबिएस, इबिडी, एयरब्याग, टिपिएमएस, पार्किङ सेन्सर र रिभर्स क्यामरा यसमा छन्।
यसरी नाइमा एक्सपोमा १८ लाख ५० हजार रूपैयाँदेखि २ करोड ९७ लाख रूपैयाँसम्मका कार प्रदर्शनमा छन्।
सस्ता कार सहरी प्रयोग र किफायती यात्रा लक्षित छन् भने महँगा कारमा उच्च पावर, ठूलो आकार, लामो रेन्ज र सुरक्षा प्रविधि प्राथमिकतामा छन्।
