लेखक नारायण वाग्लेको उपन्यास ‘पल्पसा क्याफे’को नाट्य पुस्तिका सार्वजनिक भएको छ। लेखक सुरज सुवेदीको नाट्य रूपान्तरणमा किताब बुधबार नेपाल अन्तर्राष्ट्रिय नाट्य महोत्सवमा सार्वजनिक भएको हो।
किताबलाई प्रकाशक नेपालय, लेखक सुवेदी र नाटकको स्वरूपमा ढाल्ने निर्देशक विमल सुवेदी र नाटकमा अभिनय गर्ने कलाकारहरूले सार्वजनिक गरेका छन्। केही समयअघि निर्देशक सुवेदीको निर्देशनमा थिएटर भिलेजले यो नाटक मञ्चन पनि गरेको थियो।
किताब विमोचनका क्रममा कवि नवराज पराजुली र लेखक सुवेदीले पुस्तकको अंशलाई दृश्य र पल्पसा बनेर वाचन गरेका थिए। त्यसपछि पराजुलीले सुवेदीलाई केही प्रश्न गरे।
उनले सोधे, ‘पल्पसा क्याफे पहिले नै पुतली थियो। त्यसबाट नाटक बनाउँदा अर्को पुतली निकाल्नु थियो। अर्को पुतली कसरी बनायौ?’
जवाफमा सुवेदीले भने, ‘पुतली जसरी बन्छ त्यही प्रक्रिया हो। भएकोलाई भत्काएर, नयाँ स्क्रयाचबाट फेरि नयाँ बनाएको हो। हामीलाई नाटक बनाउने भन्ने स्पष्ट थियो र त्यसमा नाट्य तत्वहरू थप्दै नयाँ पुतली बन्यो।’
उपन्यासलाई नाट्य रूपान्तरण गर्दा मूल लेखक नारायण वाग्लेले आफूलाई पूर्ण स्वतन्त्रता दिएको सुवेदीले बताए। त्यही स्वतन्त्रता सदुपयोग गर्दै उपन्यासलाई नाटक बनाउँदा कति कुरा उल्टोपाल्टो पनि गरेका छन्।
‘कतिपय ठाउँमा दृश्यले भनेका संवाद पल्पसालाई भन्न लगाइएको छ। कति ठाउँ उपन्यासका दृश्यहरू नै उल्टोपाल्टो गरिएको छ। नाटक बनाउँदा बेपत्ता पारिएका परिवारको कोणबाट कथा ल्याउन खोजेको छु,’ उनले भने।
नाट्य रूपान्तरण गर्दा उपन्यासले १५ वर्षअघि भनेको कुरा, युद्धले गरेको वाचा र युद्धले पुर्याउँछु भनेको ठाउँमा पुर्यायो कि पुर्याएन भन्ने कोणबाट पनि प्रश्न गरेको उनले बताए।
यो किताबको आवरण तयार पार्दा ‘पल्पसा क्याफे’ उपन्यासको पहिलो संस्करणकै झलक दिन खोजिएको छ।
नाटकमा पल्पसा भएर अभिनय गर्ने नायिका श्रृष्टि श्रेष्ठलाई नै मोडलका रूपमा प्रयोग गरिएको छ।
किताब विमोचनपछि ‘नाटकमा शब्दको आकृतिः कस्तो देखिन्छ? किन लेखिन्छ?’ शीर्षकमा छलफल भएको थियो। पत्रकार बसन्त बस्नेतको सहजीकरणमा निर्देशक विमल सुवेदी, दिया मास्के र लेखक उपेन्द्र सुब्बाले कुराकानी गरेका थिए। उनीहरूले नाटक लेख्ने लेखकको अभावलाई औंल्याए।
