कसैले के छ भनेर सोधिहाल्दा
एउटा जिन्दगी छ भनेर
अत्यधिक सजिलोसँग भन्न पाए
हुन त जिन्दगी नभएको होइन
र पनि जिन्दगी सहज छैन
कसैलाई खान छैन
कसैलाई लाउन छैन
कसैको सन्तान
कसैको मन छैन
सन्तान भएकाहरूसँग पनि
सँगै सन्तान छैन
एक दिन इन्टरनेट र नेटवर्क नहोस्
त्यो दिन आफ्नै छोराछोरीसँग सम्पर्क छैन
बा आमा मात्र छन् गाउँको घरमा
बा आमालाई सन्चो छैन
छोरो थियो नजिक छैन
छोरालाई विदेश बाहेक अन्त केही छैन
छोरी थिई, माइतमा छैन
जिन्दगी एक्लो छ, जीवनसाथी छैन
जीवनसाथी छ, जिन्दगी बुझेको छैन
बत्ती छ, उज्यालो छैन
मन छ, स्थिर छैन
ऋण छ, तिर्नु छैन
खाता छ, असुल छैन
पसल छ, व्यापार छैन
धन छ, शान्ति छैन
जागिर छ, पुगेको छैन
तलब छ
भ्रष्टाचार रोकेको छैन
बिरामी छ औषधि छैन
स्वास्थ्य चौकी छ
डाक्टर छैन
धारो छ
खोकी लाग्दा तातो पानी छैन
देश छ
भन्न लायक अवस्था छैन
नागरिकता छ
कतै पनि प्रयोग छैन
शिक्षा र सिप छ, रोजगारी छैन
खेत बाँझो छ, भकारीमा धान छैन
इच्छा छ, सम्मान छैन
गाउँ छ, बसाइँ छैन
स्कुल छ, पढाइ छैन
कार्यालय छ, सुशासन छैन
व्यक्ति छ, व्यक्तित्व छैन
मुख छ, मिठास छैन
दिमाग छ, प्रयोग छैन
प्रमाणपत्र छ, परिचय छैन
वातावरण छ, स्वच्छ छैन
यहाँ सब थोक छ, केही छैन
जे छ केही होइन
यहाँ राजनीति छ, सेवा छैन
सरकार छ
म छु भन्ने उसलाई थाहा छैन
के छ भन्नु यार
एउटा जिन्दगी छ भन्छस्
जिन्दगीलाई जिन्दगीको आभास छैन।
