अमेरिका, अष्ट्रेलिया, जापान र भारतका नेताहरू बिहीबार भर्चुअल बैठक गर्दैछन्।
क्वाड भनिने क्वाड्रिलेटरल सेक्युरिटी डाइलगमा आवद्ध यी चार मुलुकका नेताहरूबीच बिहीबार साँझ कुरा हुन लागेको भारतीय विदेश मन्त्रालयले जनाएको छ।
भर्चुअल बैठकमा अमेरिकी राष्ट्रपति जो बाइडेन, अष्ट्रेलियाली प्रधानमन्त्री स्कट मोरिसन, जापानी प्रधानमन्त्री फुमिओ किसिदा र भारतीय प्रधानमन्त्री नरेन्द्र मोदी सहभागी हुनेछन्।
सन् २०२१ सेप्टेम्बरमा यी चार नेताहरूले वासिङ्टन डिसीमा भेटेका थिए।
रूसले युक्रेनमाथि आक्रमण गरेको एक सातापछि चार मुलुकका नेताहरू बैठकमा बस्न लागेका हुन्।
रूसले युक्रेनमाथि गरेको आक्रमणमा अमेरिका, अष्ट्रेलिया र जापान युक्रेनतिर छन् भने भारत तटस्थ बस्दै आएको छ।