पूर्वअर्थमन्त्री तथा नेकपा (एमाले) का सांसद विष्णु प्रसाद पौडेलले सरकारको आ.व. २०७९/८० को बजेटले मुलुकले बोक्न नसक्ने गरी आर्थिक दायित्व सिर्जना गरेको बताएका छन्।
मंगलबारको प्रतिनिधि सभा बैठकमा आ.व. २०७९/०८० को राजश्व र व्ययको वार्षिक अनुमान माथि छलफलमा भाग लिदैँ सांसद पौडेलले वर्तमान सरकारले आफ्नो सिमा मिचेर पूर्ण अवधिको सरकारले जसरी बजेट प्रस्तुत गरेर मुलुकलाई धेरै आर्थिक दायित्व सिर्जना गरेको बताए।
उनले मंसिरमा प्रतिनिधि सभाको आयु सकिएर चुनाव हुनुपर्ने भन्दै वर्तमान सरकार चुनावी सरकार भएको बताए। बजेट संकटपूर्ण बन्दै गएको अर्थतन्त्रलाई ठिक बाटोमा फर्काउन तत्काल चाल्नुपर्ने कदममा केन्द्रीत हुनुपर्नेमा त्यसो हुन नसकेको उनले बताए।
‘यो चुनावी सरकार हो। तर पाँच महिनाको चुनावी सरकारले सीमा मिचेर भर्खर निर्वाचित भएको पूर्ण अवधिको सरकारले जसरी बजेट प्रस्तुत गरेको छ। भोलि चुनावबाट आउने सरकार र मुलुकलाई नै बोकी नसक्नुको आर्थिक दायित्व सिर्जना गरेको छ’, उनले भने, ‘यो बजेट आगामी पाँच महिनाका लागि दैनिक प्रशासनिक खर्च, चालु आयोजनाको निरन्तरता र प्रतिनिधि सभा र प्रदेश सभाको निर्वाचनसम्म आवश्यक पर्ने खर्चका लागि स्रोत व्यवस्थापन र विनियोजनमा केन्द्रीत हुनुपर्दथ्यो।’
बजेटले मतदातालाई भ्रममा पारेर भोट बटुल्ने उद्देश्य राखेको उनको भनाई छ।
‘संकटपूर्ण बन्दै गएको अर्थतन्त्रलाई ठिक बाटोमा फर्काउन तत्काल चाल्नुपर्ने कदममा केन्द्रीत हुनुपर्दथ्यो। तर बिडम्बना अर्थतन्त्रका चुनौतीलाई वेवास्ता गरिएको छ। र सस्तो लोकप्रियताका लागि अनुकुल ठानिएका र बिना तयारीका दिर्घकालिन प्रकृतिका योजना र कार्यक्रमहरुका चाङ लगाइएको छ’, उनले अगाडि भने, ‘सारत्ः यो बजेट, बजेट नभएर सत्तारुढ गठबन्धनको चुनावी घोषणापत्र जस्तो, चुनावी पर्चा जस्तो छ। यो मतदातालाई भ्रममा पारेर भोट बटुल्ने उद्देश्यले आएको छ।’
अर्थतन्त्रको चुनौतीलाई वेवास्ता गरिएको भन्दै सांसद पौडेलले बिना तयारीका दिर्घकालिन प्रकृतिका योजना र कार्यक्रमका चाङ लगाइएको बताए। उनले आ.व. २०७९/०८० को बजेट सत्तारूढ गठबन्धनको घोषणापत्र र चुनावी पर्चा जस्तो भएको टिप्पणी गरे।
उनले राज्यको स्रोतलाई गठबन्धनको हितमा दुरूपयोग गरिएको आरोप लगाए। बजेटले बजेटको मर्म माथि नै प्रहार गरेको उनले बताए।
राज्यशक्ति र राज्यको स्रोतलाई दल विशेष वा दलहरुको गठबन्धनको हितमा दुरुपयोग गर्न पाइदैन। तर यहाँ त्यही नहुनुपर्ने भएको छ । राज्यको स्रोतलाई आफ्नो पक्षमा मतदाता रिझाउने उद्देश्यका लागि दुरुपयोग गरिएको छ । यस अर्थमा प्रस्तुत बजेटले बजेटको मर्म माथि नै प्रहार गरेको छ ।’