पूर्वप्रधानमन्त्री एवम् एकीकृत समाजवादी पार्टीका अध्यक्ष माधवकुमार नेपालले विमानस्थल निर्माणका लागि तय गरिएको निजगढमा जंगल नै नभएको दाबी गरेका छन्।
प्रतिनिधि सभाको अन्तर्राष्ट्रिय सम्बन्ध समितिको बैठकमा नेता नेपालले निजगढ एयरपोर्टका लागि रनवे र टर्मिनल भवन बनाउने ठाउँमा जंगल नै नपर्ने बताएका हुन्। उनले सर्वोच्च अदालतको आदेश समेत यथार्थ स्थिति थाहा नभइकन गरिएको समेत टिप्पणी गरेका छन्।
गत साता सर्वोच्च अदालतले अन्तर्राष्ट्रिय विमानस्थल आवश्यक भए निजगढभन्दा अन्यन्त्र बनाउन सरकारलाई आदेश दिएको थियो। तर आदेशको पूर्णपाठ आएको छैन। नेता नेपालले सर्वोच्चको आदेशलाई दु:खद् भनेका छन्।
नेता नेपालको संयोजकत्वमा गठित संसदीय उपसमितिले पनि जंगल नमास्ने गरी विमानस्थल बनाउन आदेश दिएको थियो।