राप्रपा नेपालका अध्यक्ष कमल थापाले नेकपा एमालेको सहयोगमा मकवानपुर क्षेत्र नम्बर १ मा उम्मेदवारी दर्ता गरेका छन्। थापाले एमालेको चुनाव चिन्ह सूर्य लिएर चुनाव लड्दैछन्।
थापाको पार्टी राप्रपा नेपालबाट प्रतिनिधि सभा र प्रदेश सभाका लागि उम्मेदवारी दिएका नेता तथा कार्यकर्ताहरू भने पार्टीकै चुनाव चिन्ह तीरबाट चुनाव लड्दैछन्।
‘एमालेको चिन्ह सूर्यबाह चुनाव लड्न पाउँदा खुसी लागेको छ। सबैको सद्भाव र सहयोगको निम्ति अपिल गर्दछु,’ आइतबार उम्मेदवारी दर्तापछि थापाले ट्वीट गरेका छन्।
थापाले पत्रकारहरूसँग कुराकानी गर्दै एमालेसँग सहकार्य गरी चुनाव लड्न पाउनु खुसीको कुरा भएको पनि बताएका थिए।
‘विजयलाई सुनिश्चित गर्न मैले एमालेकै चिन्ह सूर्य लिएर चुनावमा प्रतिस्पर्धा गर्दैछु,’ उनले भने, ‘हाम्रो सहकार्य केवल एक ठाउँमा चुनाव जित्नका लागि मात्रै होइन, राष्ट्रिय परिवेशको आवश्यकताका रूपमा रहेको छ।’
राप्रपा नेपालले थापा उम्मेदवार भएका क्षेत्रमा मात्रै एमालेसँग सहकार्य गरेको छ। अन्यत्र पार्टीका उम्मेदवारहरू तीर चिन्हबाट चुनाव लड्ने पार्टी प्रवक्ता सुरेश आचार्यले बताए।
‘मकवानपुर १ मा मात्रै एमालेसँग सहकार्य गरिएको हो। अन्यत्र प्रतिनिधि सभा र प्रदेश सभा क्षेत्रमा राप्रपा नेपालका उम्मेदवार तीर चिन्हबाटै चुनाव लड्नुहुन्छ,’ उनले भने।
उनकाअनुसार काठमाडौं, चितवन, कास्की, गोरखालगायत ठाउँमा प्रतिनिधि सभा र प्रदेश सभाका लागि तीर चिन्हबाट राप्रपा नेपालका उम्मेदवारहरू चुनाव लड्दैछन्।