नेपाली कांग्रेसका महामन्त्री गगन थापाले सहकारी प्रकरणमा संसदीय छानबिन समिति गठन गर्नुपर्ने बताएका छन्।
बिहीबार साँझ नयाँ बानेश्वरस्थित संघीय संसदको ल्होत्से हलमा पत्रकार सम्मेलन गर्दै थापाले 'सहकारी प्रकरणमा संसदीय छानबिन समिति बनाएर दूधको दूध, पानीको पानी छुट्याउनुपर्ने' बताए।
‘संसदीय छानबिन समिति गठन गरौं, यसमा देशलाई अड्काएर नराखौं,’ थापाले भने, ‘किनभने सहकारीका बचतकर्ताहरू आत्तिइरहेका छन्। बचत फिर्ता पाउँछु कि पाउँदिनँ भन्ने अवस्था छ।’
उनले सदनमा दुई पक्ष जस्तो देखिएको बताए।
‘एउटा सहकारी ठग जोगाउने पक्ष र अर्को सहकारी ठगलाई कारबाही गर्ने पक्ष,’ थापाले भने, ‘यो विषयका सन्दर्भमा दुई पक्ष मात्रै छौं हामी। सहकारी ठगलाई संरक्षण गर्ने पक्षमा उभिने कि कारबाही गर्ने पक्षमा लिएर जाने भन्ने कुरा सदनभित्र भएका राजनीतिक दलले सोच्ने र निर्णय गर्ने कुरा हो।’
कांग्रेसले सहकारी प्रकरणमा उपप्रधान तथा गृहमन्त्री रवि लामिछाने जोडिएको भन्दै संसदीय छानबिन समिति गठनको माग गर्दै आएको छ। संसदीय छानबिन समिति गठन नगरेसम्म सदन चल्न नदिने कांग्रेसको भनाइ छ।
महामन्त्री थापाले सदन अवरोध गरिराख्ने कांग्रेसको चाहना नरहेको बताए।
‘हामी सदनभित्र पनि कुनै मुडभेड चाहना र प्राथमिकता हुँदै होइन,’ उनले भने, ‘हामी सदनलाई अवरोध गर्ने चाहना भएको भए यतिका दिनसम्म उभिएर बोल्ने, सदनभित्र विधेयक प्रस्तुत गर्न दिने गर्दैनथ्यौं। पहिलो दिनदेखि नै वेल घेर्थ्यौं होला। नीति तथा कार्यक्रम पनि अवरोध गर्थ्यौं होला। यो स्वयम प्रधानमन्त्रीलाई थाहा छ। निश्चित समय राखेर छानबिन गरौं, गृहमन्त्रीले राजीनामा पनि दिनुपर्दैन भनेर प्रधानमन्त्रीसँगका छलफलमा भनेका छौं।’
उनले संसदीय छानबिन समिति नबनेसम्म सदनको कामकारबाही अघि नबढ्ने पनि बताए। ‘गृहमन्त्री, प्रधानमन्त्रीले बोल्ने कुरा हामीले तोक्ने होइन तर संसदीय छानबिन समिति गठन नहुँदासम्म सदनको कामकारबाही अघि बढ्दैन,’ महामन्त्री थापाले भने।
उनले एमालेले पेल्न खोजेको पनि बताएका थिए।
‘तर हामी गम्भीर र जिम्मेवार छौं। सभामुखको आजको भूमिकाप्रति हाम्रो ठूलो प्रश्न र असन्तुष्टि छ। सरकार पक्षबाटै आज मुठभेडको स्थिति सिर्जना गर्न खोजिएको छ,’ उनले भने, ‘भोलि बिहान ११ बजे संसद बैठक छ। हामी अपेक्षा गर्छौं त्यसअघि सरकारले संसदीय छानबिन समिति बनाउँछ।’
भिडिओ:
-1715866338.jpg)
