गुल्मी-१ का लागि नेपाली कांग्रेसका चन्द्र भण्डारी र प्रदीप ज्ञवाली पुरानै प्रतिस्पर्धी हुन्। यसपालि मंसिर ४ मा हुने प्रतिनिधि सभा चुनावमा पनि यो क्षेत्रमा उनीहरूबीच नै मुख्य प्रतिस्पर्धा हुने भएको छ। गुल्मी-१ का मतदाताले उनीहरूलाई पालैपालो निर्वाचित गराएको इतिहास छ।
२०५६ सालको चुनावमा ज्ञवालीले क्षेत्र नम्बर १ बाट कांग्रेसका चन्द्र केसीसँग प्रतिस्पर्धा गरेका थिए। त्यस निर्वाचनमा ज्ञवाली नै विजयी भए। त्यसपछि २०६४, २०७० र २०७४ र २०७९ सम्मको चुनावमा ज्ञवाली गुल्मी-२ बाट उठ्दै आएका छन्।
यसअघिका तीन चुनावमा यस क्षेत्रका मतदाताले दुई पटक भण्डारी र एक पटक ज्ञवालीलाई प्रतिनिधि चुनेका छन्। २०६४ सालको निर्वाचनमा ज्ञवालीले चुनाव जितेका थिए भने २०७० को निर्वाचनमा भण्डारी निर्वाचित भएका थिए। यस्तै, २०७४ को निर्वाचनमा ज्ञवाली चुनिएका थिए। २०७४ सालको चुनावमा ज्ञवालीले वाम गठबन्धनको साथ पाएका थिए। यसपटक भण्डारीलाई सत्ता गठबन्धनको साथ रहेको छ।
गत वैशाखमा भएको स्थानीय चुनावमा वडाध्यक्ष उम्मेदवारले पाएको मत हेर्दा सत्ता गठबन्धन एमालेभन्दा १ हजार ६० मतले मात्रै अघि छ। कांग्रेसका उम्मेदवारहरूले ३१ हजार २ सय ९४ मत पाएका छन् भने माओवादी केन्द्रका उम्मेदवारहरूको मत ४ हजार ९ सय ७० रहेको छ। यहाँ नेकपा (एकीकृत समाजवादी) को मत ४९७ मात्रै छ।
एमाले वडाध्यक्ष उम्मेदवारहरूले पाएको मत ३५ हजार ७ सय १ छ। पालैपालो निर्वाचन जित्ने ज्ञवाली र भण्डारीमध्ये मतदाताको रोजाइमा यसपटक को पर्लान्? उनीहरू दुई जनामध्ये को बलियो छ भन्ने कुरा अहिले नै प्रष्ट भइसकेको छैन।
पार्टी विभाजित हुँदा पनि सत्ता गठबन्धनभन्दा अलिकति मात्र कम मतले पछि परेका ज्ञवालीलाई लगातार दुई पटक जित्न तटस्थ मतदाताको मत आफूतिर तान्नुपर्ने चुनौती छ। २०६४ का यताका तीन वटै चुनावमा लगातार दुई पटक एकै उम्मेदवारलाई नजिताएका गुल्मी-१ का मतदातालाई ज्ञवालीले आफूलाई फेरि सांसद बनाउन कन्भिन्स गराउनु पर्नेछ।
ज्ञवाली आफ्नो पार्टीको मात्र असन्तुष्ट कांग्रेस पक्षले आफूलाई मत दिनेमा विश्वस्त देखिन्छन्। गुल्मीको विकास निर्माण र विपद् व्यवस्थापनमा निर्वाह गरेको भूमिकाले जनताले आफूलाई फेरि चयन गर्ने उनको दाबी छ।
'सत्ता गठबन्धन छ, प्रतिस्पर्धा नै छैन त म भन्दिँन तर म आफ्नो विजयप्रति ढुक्क छु,’ ज्ञवालीले भने,'कांग्रेस आफ्नो पहिचान गुमाउने स्थितिमा पुगेको भन्दै असन्तुष्ट साथीहरूले पनि सहयोगको प्रतिवद्धता जनाउनुभएको छ। एमालेको सुदृढ संगठन र सत्ता गठबन्धनका असन्तुष्ट साथीहरूको सद्भावका कारण निर्वाचन परिणामप्रति मैले तनाव लिएको छैन।'
कांग्रेस उम्मेदवार भण्डारीलाई भने माओवादीको सबै मत आफूतिर तान्नुपर्ने चुनौती छ।
सत्ता गठबन्धनकै कारण आफ्नो जित सहज रहेको उनी बताउँछन्।
'यो क्षेत्रमा म हार्नु पर्ने कुनै कारण छैन। त्यसमाथि अहिले त सत्ता गठबन्धन छ। २०७० मा निर्वाचित हुँदा मैले गरेका कामका कारणले पनि जनताले मलाई निर्वाचित गराउने छन्,' उनले भने।