नेकपा एमालेका सांसद रघुजी पन्तले राष्ट्रपतिको निर्वाचनअघि भारतीय विदेश सचिवले गरेको नेपाल भ्रमण र भेटघाटलाई लिएर संसदमा प्रश्न उठाएका छन्।
भारतीय विदेश सचिव विनयमोहन क्वात्राले हालै नेपालको भ्रमण गरेका थिए। उनले राष्ट्रपति, प्रधानमन्त्री, पूर्वप्रधानमन्त्रीहरू लगायतसँग भेटवार्ता गरेका थिए।
नेपालको राजदूत वा परराष्ट्र मन्त्रालयका सचिव भारत जाँदा यही किसिमको सहज भेटघाट नहुने पनि सांसद पन्तले बताए।
‘राष्ट्रपतिको चुनावअघि भारतीय विदेश सचिव यहाँ आउँछन्, उनी प्रधानमन्त्री, परराष्ट्र सचिवलाई मात्र होइन राष्ट्रपति र पूर्वप्रधानमन्त्रीहरूसँग भेट गर्छन्,’ क्वात्राको भ्रमणलाई लक्षित गर्दै बुधबार संसद बैठकमा उनले भने, ‘विदेश सचिव आउँदा भेटघाटका समाचार अखबारमा हेर्दा लाजमर्दो हुन्छ। किन यस्तो हुन्छ?’
उनले विदेशका अधिकारीहरू र राजदूतहरूले गर्ने भेटघाटलाई नियमन गर्न सरकार र परराष्ट्र मन्त्रालयको ध्यानाकर्षणसमेत गराएका छन्।
भिडिओ: