राष्ट्रिय स्वतन्त्र पार्टीका सभापति रवि लामिछानेमाथि राहदानी विवादमा मुद्दा नचलाउने महान्यायाधिवक्ताको निर्णयविरूद्ध परेको रिटमा अहिले सुनुवाइ भइरहेको छ।
युवराज पौडेल (सफल) ले दिएको रिटको सुनुवाइ न्यायाधीश हरिप्रसाद फुयालको एकल इजलासमा सुरू भएको हो।
सुनुवाइमा बहस गर्दै रिट निवेदकका वकिलले दुई वटा माग गरेका छन्।
वरिष्ठ अधिवक्ता सुरेन्द्र भण्डारीले लामिछानेले फेरि नागरिकता लिएको मिति माघ १५ गते आइतबार भएकाले उक्त दिन उनले अमेरिकी नागरिकता त्यागेको निस्सा प्रशासनमा बुझाएकोमा आफूलाई शंका रहेको बताए।
‘शुक्रबार फैसला भयो, शनिबार विदा थियो। आइतबार उहाँले फेरि नागरिकता लिनुभयो। नागरिकता त्यागेको निस्सा अमेरिकी विदेश मन्त्रालयले दिनुपर्छ, त्यो डकुमेन्ट दूतावासले प्रमाणीकरण गर्नुपर्छ,’ भण्डारीले भने,‘त्यो दिन अमेरिकी दूतावास विदा हुन्छ। उहाँले कसरी प्रमाणीकरण भएको निस्सा पेस गर्नुभयो?’
अदालतले जिल्ला प्रशासन कार्यालयबाट त्यो निस्सा मगाउन उनले माग गरेका छन्।
लामिछानेले अमेरिकाको राहदानी हुँदाहुँदै लिएको नेपाली राहदानी प्रयोग गरेर कुन-कुन मुलुक गए भन्ने विवरण पनि अध्यागमन विभागबाट मगाउन भण्डारीले माग गरेका छन्।
लामिछानेको राहदानीसम्बन्धी विवादमा मुद्दा नचलाउने निर्णय गर्दा महान्यायाधिवक्ताले कानुनसम्मत निर्णय नगरेको भण्डारीले तर्क गरे।
‘उहाँले लामिछानेले राहदानी नवीकरण गरेको भन्नुभएको छ। हाम्रो कानुनमा म्याद सकिएपछि राहदानी नयाँ बनाउनु पर्छ, नवीकरण हुँदैन,’ भण्डारीले भने,‘झुठा विवरण दिई बनाएको राहदानी रद्द भएपछि लिने व्यक्ति निर्दोष थियो भन्न मिल्दैन। किनकी हाम्रो कानुनले झुठा विवरण दिएर राहदानी लिन त परको कुरा लिने प्रयत्न गर्नुलाई पनि अपराध मानेको छ।’
महान्यायाधिवक्ताले निर्णय गर्दा लामिछानेले जानी जानी झुठा विवरण दिएको नदेखिएको तर्क गरेको उल्लेख गर्दै भण्डारीले अमेरिकी नागरिक हुँदाहुँदै नेपाली राहदानी लिएको स्पष्ट तथ्य रहेको बताए।
महान्यायाधिवक्ताको निर्णयमा रवि आपराधिक मनसाय देखिन्न भन्ने पनि उल्लेख भएको भन्दै भण्डारीले आपराधिक मनसाय थियो कि थिएन भन्ने कुरा महान्यायाधिवक्ताको क्षेत्राधिकार नभई अदालतको भएको बताए।
‘यसरी हेर्दा रवि लामिछानेको राहदानी विवादमा निर्णय गर्दा महान्यायाधिवक्ताले पदको दुरूपयोग गरेको देखिन्छ,’ भण्डारीले भने।
आजको सुनुवाइ रिट निवेदकका तर्फबाट भण्डारीसँगै अधिवक्ता राधिका खतिवडा, रमण कर्णलगायतले बहस गरेका छन्।
रविका तर्फबाट पनि दुई वकिलले बहस गरेका छन्।
