काठमाडौंको बानेश्वरमा भएको जेनजी पुस्ताको आन्दोलनमा प्रहरीले बल प्रयोग गर्दा १९ जनाको ज्यान गएकोबारे अन्तर्राष्ट्रिय संघ संस्थाले दु:ख व्यक्त गरेको छ।
सोमबार काठमाडौंमा १७ र इटहरीमा दुई जनाको ज्यान गएपछि एमनेष्टि इन्टरनेशनल, संयुक्त राष्ट्रसंघ, युनिसेफ लगायत संस्थाले यस घटनाबारे ध्यानाकर्षण भएको जनाएको हो।
जेनजी पुस्ताले देशमा भ्रष्टाचार मौलाएको र सामाजिक सञ्जाल बन्द गरेको विरोधमा प्रदर्शनको घोषणा गरेको थियो।
एम्नेष्टि इन्टरनेशनलले जारी गरेको विज्ञप्ति अनुसार यस घटनामा स्वतन्त्र अनुसन्धान तथा जबाफदेहिताको माग गरेको छ।
एम्नेष्टि नेपालका निर्देशक निराजन थपलियाले भनेका छन्, ‘एम्नेष्टि इन्टरनेशनलले नेपालमा भएका प्रदर्शनकारीको मृत्यु र गम्भीर घाइते हुने गरी प्रयोग गरिएको घातक तथा कम घातक बलको अवैध प्रयोग गरेको घटनाप्रति कडा रूपमा भर्त्सना गरेको छ। हामी सम्बन्धित निकायलाई अधिकतम संयम अपनाउन आग्रह गर्छौं।’
यस्तै सरकारले यस घटनामा स्वतन्त्र तथा निष्पक्ष अनुसन्धान समेत गर्नुपर्ने बताएको छ। र यसमा संलग्न जोकोहीलाई जबाफदेही समेत बनाउनुपर्ने जनाएको छ।
‘नेपाल सरकारले तुरून्तै पूर्ण, स्वतन्त्र र निष्पक्ष अनुसन्धान गरी ज्यान जाने गरी भएको घटनामा दोषी देखिएका जोकोहीलाई फौजदारी कानुनमार्फत जबाफदेही बनाउन जरूरी छ,’ एम्नेष्टिले भनेको छ।
त्यस्तै संयुक्त राष्ट्रसंघ मानव अधिकारकी प्रवक्ता रभिना शामदोसानीले पनि यस घटनामा पारदर्शी अनुसन्धानको माग गरेकी छिन्।
उनले सोमबार राति एक भिडिओ सन्देशमार्फत यस घटनाबाट दु:ख लागेको बताउँदै अधिकारीहरूलाई अधिकार, शान्तिपूर्ण तवरले गरिने प्रदर्शन र अभिव्यक्ति स्वतन्त्रताको सम्मान गर्न गर्न अनुरोध गरेकी छन्।
‘सबै सुरक्षा निकायले बल र बन्दुकको प्रयोगसम्बन्धी आधारभूत सिद्धान्तको पालना गर्नुपर्छ,’ उनले भनेकी छन्।
त्यसैगरी बालबालिकाको अधिकारसम्बन्धी अन्तर्राष्ट्रिय संस्था युनिसेफले पनि बालबालिकामाथि भएको आक्रमण अस्वीकार्य भएको बताएको छ।
‘नेपालभर भएका विरोध प्रदर्शनहरूमा बालबालिकाविरूद्ध भएको हिंसाको रिपोर्टबाट युनिसेफ चिन्तित छ। बालबालिका विरूद्ध बल प्रयड्डग अस्वीकार्य छ र यो तुरून्तै बन्द हुनुपर्छ,’ युनिसेफले सामाजिक सञ्जालमा लेखेको छ।
-ink-1757321272.jpeg)
-1746009348.jpg)
