भदौ २४ गते प्रदर्शनकारीहरूले लगाएको आगोमा जलेको सिंहदरबार पुनर्निर्माण गर्नू भन्दै एक किसानले सरकारलाई एक लाख रूपैयाँ दिएको छ।
अर्घाखाँचीका किसानले जिल्ला प्रशासन कार्यालयमै गएर प्रधानमन्त्री दैवीप्रकोप सहायता कोषमा एक लाख रूपैयाँ जम्मा गरेका हुन्। उनले उक्त त्यसको भौचर प्रमुख जिल्ला अधिकारीलाई हस्तान्तरण गरेका छन्।
सोमबार दिउँसो साढे ३ बजेतिर आधा फुलेको दाह्री, नसमेलिएको कपाल, खरानी रङको पाइन्ट, खैरो टिसर्ट र हाफ ज्याकेट लगाएका एक व्यक्ति जिल्ला प्रशासन कार्यालय अर्घाखाँची आइपुगेका थिए।
त्यति बेला प्रमुख जिल्ला अधिकारी (सिडिओ) गोपालप्रसाद अर्याल कार्यकक्षमै थिए।
ती व्यक्तिले सिडिओको कार्यकक्ष पुगेर आफ्नो ब्यानर खोल्दै भने, 'सिंहदरबार जल्दै गर्दा मलाई मेरो आस्था जलिरहेजस्तो लाग्यो। बरू मेरो घर जल्दा फरक पर्ने थिएन होला। मलाई त्यति धेरै चोट परेको छ।'
ब्यानरको माथिपट्टि जलिरहेको सिंहदरबारको तस्बिर छापिएको थियो। तल राता अक्षरमा 'म बनाउँछु मेरो सिंहदरबार, म बनाउँछु मेरो देश' लेखिएको थियो। टाउकोमा पहेँलो रङको हेलमेट लगाएर काँधमा इँटा बोकेका युवाको तस्बिर पनि छापिएको थियो।
यसरी सिंहदरबार जलेकोमा दु:खमनाउ गर्न आएका ती व्यक्ति कुनै अभियन्ता थिएनन्।
उनी थिए, वर्षौंदेखि तरकारी खेती गर्दै आएका अर्घाखाँचीको शितगंगाका किसान तुलसीराम अधिकारी।
खोटाङ घर भएका अधिकारी पाँच–छ वर्षदेखि शितगंगा नगरपालिका-२ सीतापुरमा व्यावसायिक टिमुर र तरकारी खेती गर्दै आएका छन्। उनी सन्धिखर्क तारामार्गका अर्का किसान ठाकुरप्रसाद खनालका साथमा प्रशासन कार्यालय पुगेका थिए।
दुई घन्टा गाडी चढेर जिल्ला प्रशासन कार्यालय पुगेका उनीहरूको एउटै उद्देश्य थियो — प्रदर्शनकारीहरूले आगजनी गरेर ध्वस्त पारेको सिंहदरबार पुनर्निर्माणमा सहयोग गर्नु।
त्यसका लागि उनीहरूले १ लाख १ सय रूपैयाँ प्रधानमन्त्री दैवीप्रकोप सहायता कोषमा जम्मा पनि गरिसकेको बताए।
देशको इतिहास सिंहदरबार जलेकाले पुनर्निर्माणका लागि आफूबाटै अभियान सुरू गरेको अधिकारीको भनाइ छ।
'सिंहदरबार एउटा भवन मात्र होइन, नेपालको इतिहासको धरोहर हो। जुन दिनदेखि सिंहदरबार जल्यो, त्यो दिनबाट म निदाउन सकेको छैन,' उनले भने, 'जलिरहेको सिंहदरबार र रगतमा लतपतिएका मृतकका तस्बिरले मलाई झस्काइरहेको छ।'
अधिकारीले सीतापुरमा जग्गा किनेर र भाडामा लिएर टिमुर, काँक्रा, टमाटर, गोभी, खुर्सानी लगायत तरकारी खेती गर्दै आएका छन्।
उनले प्रधानमन्त्री दैवीप्रकोप सहायता कोषमा जम्मा गरेको १ लाख १ सय रूपैयाँको भौचर सिडिओ अर्याललाई हस्तान्तरण गरे। उक्त अवसरमा अर्यालले स्वच्छ भावना लिएर देशका लागि सहयोग गरेकामा अधिकारीलाई धन्यवाद दिए।
'आन्दोलनका क्रममा आगजनी र तोडफोडबाट ध्वस्त संरचनाहरू पुनर्निर्माणका लागि सरकारले कुनै कोष बनाइनसकेकाले प्रधानमन्त्री दैवीप्रकोप सहायता कोषमा जम्मा गर्न भनेका थियौं,' अर्यालले भने।
***
-1746009348.jpg)
