जेनजी प्रदर्शनपछि भदौ २४ गते भएको आगजनीमा परेर सवारी साधन गुमाएको नेपाल प्रहरीले गाडी उपलब्ध गराउन अथवा किनिदिन निर्वाचन आयोगले सरकारलाई मौखिक सुझाव दिएको छ।
निर्वाचनका लागि सुरक्षा व्यवस्था प्रमुख सर्त भएकाले प्रहरीका लागि आवश्यक गाडी तत्काल किनिदिन अन्तरिम सरकारकी प्रधानमन्त्री सुशीला कार्की र गृहमन्त्री ओमप्रकाश अर्याललाई निर्वाचन आयोगका आयुक्तहरूले आग्रह गरेका हुन्।
‘निर्वाचन गराउनका लागि सबैभन्दा पहिलो सर्त सुरक्षा हो,’ आयोगका एक पदाधिकारीले सेतोपाटीसँग भने, ‘हामीले सुरक्षाका लागि प्रहरी परिचालन हुनुपर्ने र त्यसका लागि आवश्यक सवारी साधनको व्यवस्था गरिदिन भनेका छौँ। अन्य निकायमा भए त्यहाँबाट र नभए किनेर भए पनि प्रहरीलाई गाडी दिन भनेका छौँ।’
भदौ २४ गते नेपाल प्रहरीका प्रहरी चौकी जल्नुका साथै ठूलो संख्यामा सवारी साधन जलाइएको थियो। नेपाल प्रहरीका प्रवक्ता विनोद घिमिरेका अनुसार क्षति भएका गाडीको विवरण र आवश्यकताबारे गृह मन्त्रालयलाई पत्राचार गरेको उल्लेख गरे।
तर उनले कति गाडी माग गरिएको हो भन्ने विषयमा खुलाएनन्। स्रोतका अनुसार प्रहरीले आफूलाई तत्कालै परिचालनका लागि ५ सय सवारी साधन आवश्यक भएको पत्र पठाएको छ। काठमाडौं उपत्यकामा मात्रै प्रहरी कार्यालयका ७४ वटा साना गाडी पूर्ण क्षति भएको छ। त्यस्तै ट्राफिक प्रहरीका २१ वटा गाडी जलेर नष्ट भएको छ। त्यस्तै प्रहरी कार्यालयका १६ वटा हेभी गाडीमा कामै नलाग्ने अवस्थामा छ।
‘मोटरसाइकलसहित हाम्रो ५ सयभन्दा धेरै सवारी साधन आगजनी भएका छन्,’ प्रहरी प्रवक्ता घिमिरेले भने, ‘जसमा १ सय ८२ वटा चार पांग्रे सवारी साधन छन्।’
स्रोत : नेपाल प्रहरी
प्रहरीले कानुनी शासन र सुशासनका लागि तत्कालै परिचालन भएर विभिन्न ठाउँमा पुग्न गाडी छिटोभन्दा छिटो उपलब्ध गराउन आग्रह गरेको छ। तर गृह मन्त्रालयले भने गाडी किन्ने विषयमा कुनै निर्णय गरेको छैन।
गृह मन्त्रालयले भने मन्त्रिपरिषद्ले नयाँ खरिद कार्य तत्काल अघि नबढाउन भनेर गरेको निर्णय देखाएर पन्छिँदै आएको छ। मन्त्रिपरिषद्को निर्णयका आधारमा अर्थ मन्त्रालयले गरेको परिपत्रमा पुरानो सवारी साधन प्रयोग गर्न भनिएको छ।
प्रहरीले सवारी साधन नभएका कारण कानुनी शासन कायम गर्न समस्या हुने भन्दै राष्ट्रपतिदेखि प्रधानमन्त्रीसम्मलाई ध्यानाकर्षण गराइसकेको छ। राष्ट्रपति रामचन्द्र पौडेलले पनि सरकारलाई सुरक्षाको व्यवस्था मिलाउन र प्रहरीका लागि अत्यावश्यक सामग्री उपलब्ध गराउन सुझाव दिएका छन्।
1635339834.jpeg)
-1756794700.JPG)
-1746009348.jpg)
