नेपाली कांग्रेसका महामन्त्री गगन थापाले अहिले मथिंगल खलबलिएको बेला भएकाले पार्टीको महाधिवेशन गरेर व्यापक रूपान्तरणसहित अघि बढ्नुपर्ने बताएका छन्।
सानेपामा बिहीबार बसेको केन्द्रीय कार्यसमिति बैठकमा महामन्त्री थापाले यही अवस्थाको पार्टीलाई नागरिकले सरासर मत नदिने बताए।
'मथिंगल खलबलिएको बेला छ, नागरिकले सरासर गएर मत दिँदैनन्। त्यसैले ठूलो जोखिम उठाएर भए पनि परिवर्तन गर्नैपर्छ र नागरिकलाई हामी यो परिस्थिति सम्हालेर लैजान्छौं भनेर विश्वास दिलाउनुपर्छ,' उनले भने।
उनले चुनावअघि महाधिवेशन गर्नैपर्ने र त्यो महाधिवेशनले पार्टीलाई व्यापक सुधार गर्ने बताए।
'हामी महाधिवेशनबाट प्रायश्चित गर्छौं, पार्टी कसरी अघि बढ्छ पनि भन्छौं,' उनले भने, 'यी यी कुरामा हामी चुक्यौं, तपाईंहरू रिसाउनुभएको छ, अब सुधार गरेर जान्छौं भनेर महाधिवेशनबाट भन्नुपर्छ।'
उनले पार्टी चुनावदेखि चुनावसम्म भन्ने मनस्थिति मेसिनजस्तो रहेको उल्लेख गर्दै पावरभन्दा सिद्धान्त ठूलो भएको बताए।
कब्जाको मानसिकताबाट विद्यालय व्यवस्थापन समितिदेखि अख्तियारसम्म भाग खोज्दा त्यसबाट नागरिकहरू रिसाएको उनको भनाइ थियो।
'महाधिवेशन गरियो भने हामी यो कुरा सुधार गरेर जान्छौं, कब्जाको मानसिकताबाट नागरिक रिसाएका छन्। त्यसैले जनादेशमा जानुअघि पार्टी सुधार गरौं, त्यो सुधार हामी केन्द्रीय समितिबाट निर्णय गरेर गर्न सक्दैनौं, महाधिवेशन नै गर्नुपर्छ,' उनले भने।
उनले जेनजी पुस्तालाई पनि भरोसा लाग्ने गरी पार्टीमा सुधार आवश्यक रहेको बताए।
महामन्त्री थापाले राष्ट्रिय नवीकरण नीति अभियान घोषणा गरेर जानुपर्नेमा जोड दिँदै भने, 'राजनीति, लोकतन्त्रमा निखारता ल्याउनुपर्छ। घरमा जस्तै पार्टीमा पनि चार पुस्ताका अनुभव जोड्नुपर्छ।'
उनले चुनावमा जानुअघि के के काम गर्ने भनेर पहिले नै भन्नुपर्ने पनि बताए। त्यो काम पनि महाधिवेशनबाट मात्रै गर्न सकिने उनको भनाइ थियो।
'इच्छा छ भने महाधिवेशन गर्न सकिन्छ। यहाँ क्रियाशील सदस्यताको कुरा पनि आयो। भन्दाभन्दै केहीले अलि बढी पनि भन्नुभयो, महामन्त्रीको जिम्मा हो भनेर। विधान पढ्नुभएको छैन, पढ्नू है,' उनले भने।
'क्रियाशील सदस्यता व्यवस्थापन समितिको काम सूचना दिने हो, फारम दिने हो, त्यो नदिएको भए भन्नू। ८ लाख ८० हजार फारम तीन वर्षअघि नै जिल्ला पठाएको हो,' उनले भने, 'अहिलेसम्म त्यो फारम नखोल्ने जिल्ला सभापतिले महामन्त्रीले काम गरेन भनेर भाषण गरेको सुनेँ। यो महामन्त्रीले होइन जिल्ला र क्षेत्रले गर्ने काम हो। हामीले त अभिलेख राख्ने काम मात्रै हो।'
-1746009348.jpg)
