अमेरिकी राष्ट्रपति डोनाल्ड ट्रम्पले रूस-युक्रेन युद्धविरामका लागि तयार पारिएको २८ बुँदे प्रस्ताव अन्तिम नरहेको बताएका छन्।
शनिबार ह्वाइट हाउसमा पत्रकारहरूसँगको कुराकानीमा ट्रम्पले आफूले प्रस्ताव गरेको २८ बुँदे योजना युक्रेनका लागि अन्तिम विकल्प नरहेको बताएका हुन्।
ट्रम्पले रूसी राष्ट्रपति भ्लादिमिर पुटिनसँग परामर्श गरी रूसलाई नै बढी फाइदा हुने गरी युद्धविराम सम्झौताका लागि मस्यौदा तयार पारेका थिए।
त्यसमा रूसले माग गरेअनुसार नै युद्धमा गुमाएको जमिन युक्रेनले रूसलाई दिनुपर्ने, नेटो सदस्य राष्ट्रमा सामेल हुन नपाउने, युक्रेनी सेनाको आकार ६ लाखमा घटाउनुपर्ने लगायतका सर्तहरू उल्लेख छन्।
ती प्रस्तावहरूमा सहमत हुनका लागि ट्रम्पले जेलेन्स्कीलाई नोभेम्बर २७ सम्मको अल्टिमेटम दिएका थिए।
शान्ति प्रस्ताव स्वीकार नगरे युक्रेनलाई गुप्तचर सहयोगदेखि हतियार आपूर्ति रोक्नेसम्को चेतावनी ट्रम्पले दिएका छन्।
अमेरिकाले रूसलाई फाइदा पुग्नेगरी प्रस्ताव गरेपछि युक्रेनका राष्ट्रपति भोलोदिमिर जेलेन्स्कीले आफू धर्मसंकटमा परेको बताएका थिए।
उनले युक्रेनको स्वाभिमान, आत्मसम्मान र प्रतिष्ठा एकातिर र देशको मुख्य सहयोगी अर्कातिर राखेर दुई मध्ये एउटा रोज्नुपर्ने परिस्थिती रहेको बताएका थिए।
अमेरिकाले एकतर्फी ढंगले शान्ति प्रस्ताव तयार पारेपछि युरोपेली नेताहरूले त्यसको विरोध गरेका थिए।
आइतबार स्विट्जरल्यान्डको जेनेभामा वेलायत, फ्रान्स, जर्मनी, अमेरिका र युक्रेनका उच्च सुरक्षा अधिकारीबीच वार्ताको तयारी छ।
त्यसअघि ट्रम्पले आफूले तयार पारेको खाका अन्तिम प्रस्ताव नरहेको भनेको अमेरिकी टेलिभिजन नेटवर्क सिएनएनले जनाएको छ।
' यो अन्तिम प्रस्ताव होइन। आवश्यक परे संशोधन गर्न सकिन्छ,' उनले पत्रकारहरूसँग भने, 'एक न एक तरिकाले यो युद्ध अन्त्य गर्नैपर्छ, हामी त्यसैमा काम गरिरहेका छौं।'
यो पनिः बिलखबन्दमा जेलेन्स्की, भन्छन्– या स्वाभिमान गुमाउनुपर्यो वा अमेरिकाको साथ
-1746009348.jpg)
