नेकपा एमाले अध्यक्ष केपी शर्मा ओलीका पक्षमा लागेका नेताहरू नै अध्यक्षका अर्का दाबेदार ईश्वर पोखरेलका पक्षमा खुल्न थालेका छन्।
विगतमा सधैं ओलीको पक्षमा रहेका एमाले कास्कीका युवा नेता दर्शन लामा, लमजुङका जुन तामाङ, केन्द्रीय सदस्यहरू इन्द्रलाल सापकोटा, जमिन्द्रमान घले लगायत नेता पोखरेलका पक्षमा खुलेका हुन्।
ओली पक्ष भने गण्डकीबाट ९० प्रतिशत मत आफ्नो पक्षमा आउने दाबी गर्छ। बाहिर हल्ला चलेजस्तो अवस्था नभएको उनीहरू बताउँछन्।
ओली खेमाबाट एमाले कास्कीको सचिव बनेका दर्शन लामा त्यसअघि उपसचिव र जिल्ला सदस्य पनि ओली खेमाबाटै बनेका थिए। पोखरा–१३ का पूर्ववडाध्यक्ष समेत रहेका लामा कास्कीबाट सर्वसम्मत महाधिवेशन प्रतिनिधि छनौट भएका थिए। महाधिवेशन प्रतिनिधि छनौट भइसकेपछि उनी पोखरेलका पक्षमा खुलेका हुन्।
उनले आफू मात्र नभएर कास्कीबाट छनौट भएका २३ जनामध्ये ८ जना पोखरेलका पक्षमा लागिसकेको दाबी गरे।
'पार्टीमा अब नेतृत्व परिवर्तन गर्नुपर्छ भनेर लागेको हुँ, कसैको विरूद्ध लागेको होइन,' उनले भने, 'ओलीज्यू दुई पटक अध्यक्ष र प्रधानमन्त्री भइसक्नुभयो। उहाँले गर्न सक्ने राम्रो काम पनि गरिसक्नुभयो।'
ओलीविरूद्ध उभिएका एमाले लमजुङका युवा नेता जुन तामाङ पनि जेनजी आन्दोलनको पाठका रूपमा अब नेतृत्व परिवर्तन अपरिहार्य देख्छन्।
पूर्वविद्यार्थी नेता तामाङ लमजुङबाट सर्वाधिक मत पाएर महाधिवेशन प्रतिनिधि चुनिएका छन्। लमजुङबाट बहुमत महाधिवेशन प्रतिनिधिले पोखरेललाई मतदान गर्ने उनको दाबी छ।
'लमजुङबाट छनौट भएका बहुमत महाधिवेशन प्रतिनिधिले पोखरेललाई मतदान गर्नुहुन्छ,' उनले भने, 'पार्टीभित्र फरक मत राख्नेको सम्मान गर्ने संस्कृति बचाउन र पार्टी रूपान्तरण गर्न नेतृत्व परिवर्तन आवश्यक छ।'
जेनजी आन्दोलनले देश र पार्टीलाई ठूलो हानि गरेको भन्दै उनले यसको शिक्षाका रूपमा नेतृत्व हस्तान्तरण, रूपान्तरण र पुनर्गठन आवश्यक रहेको बताए।
एमालेका युवा नेताहरू खुलेर लाग्दा गण्डकीबाट प्रतिनिधित्व गर्ने केन्द्रीय सदस्यहरू पनि खुल्न थालेका छन्।
एमाले केन्द्रीय सदस्य जमिन्द्रमान घले, इन्द्रलाल सापकोटा लगायत नेता पोखरेलका पक्षमा खुलेका छन्। सापकोटा र घले एमाले विभाजन हुनुअघि माधव नेपालका पक्षमा थिए। पार्टी विभाजनपछि उनीहरू ओलीकै नेतृत्वमा बसेका थिए।
एमाले केन्द्रीय सदस्य सापकोटाले अब एमाले जोगाउन पनि नेतृत्व परिवर्तन आवश्यक रहेको बताए।
'एमाले कसरी बचाउने भन्ने प्रश्न छ। कुनै व्यक्तिको कुरा होइन,' उनले भने, 'जसलाई एमाले चाहिएको छ, जसलाई माया छ, उसले नेतृत्व परिवर्तन गर्छ।'
ओली पक्षीय नेताहरू भने गण्डकीबाट ९० प्रतिशत मत ओलीलाई जाने दाबी गर्छन्। पार्टी जोगाउन ओलीको विकल्प खोज्न नहुने उनीहरूको तर्क छ।
एमाले कास्कीका नेता तथा सांसद बेदबहादुर गुरूङ 'श्याम' ले कास्कीबाट सबै मत ओलीका पक्षमा जाने बताए। पार्टी संकटमा रहेकाले नेतृत्व परिवर्तन गर्न नहुने उनको तर्क छ।
ओली पक्षका नेता माधव बास्तोला पनि बाहिर हल्ला चलेजस्तो अवस्था नरहेको बताउँछन्। सर्वसम्मति भएका सबै जिल्लाबाट ओलीका पक्षमा मतदान हुने उनको भनाइ छ।
'गण्डकी प्रदेशबाट ९० प्रतिशत मत ओलीलाई जान्छ,' उनले भने, 'बाहिर हल्ला चलेजस्तो अवस्था छैन।'
गण्डकी प्रदेशको भूगोलबाट एमालेका महाधिवेशन प्रतिनिधिमा १३७ जना छनौट भएका छन्। यो गत अघिल्लो महाधिवेशनभन्दा कम हो। अघिल्लो महाधिवेशनमा गण्डकी प्रदेशबाट १५२ जना महाधिवेशन प्रतिनिधिले भाग लिन पाएका थिए। त्यति बेला गण्डकीमा एमालेका संगठित सदस्य ५४ हजार थिए भने अहिले ५६ हजार बढी छन्।
पार्टी सदस्य बढे पनि महाधिवेशन प्रतिनिधि छान्ने विधिले प्रतिनिधि संख्या घटेको प्रदेश सचिव धनञ्जय दवाडी बताउँछन्।
उनका अनुसार पहिले महाधिवेशन प्रतिनिधि छान्दा ८ सयभन्दा बढी पार्टी सदस्य बराबर एक जना हुने र त्योभन्दा २-४ जना बढी भए दुई जना प्रतिनिधि छान्न मिल्थ्यो। अहिले कम्तिमा ५० जना बढी हुनुपर्ने नियम राखिएकाले केही प्रतिनिधि घटेको दवाडीको भनाइ छ।
लमजुङ, गोरखा, नवलपुर र तनहुँको क्षेत्र नम्बर १ बाट महाधिवेशन प्रतिनिधि छनौट गर्न चुनाव भएको थियो। चुनावमा बहुमत संगठित सदस्यले मतदानमा भाग लिएका थिएनन्। गण्डकीका बाँकी जिल्लामा भने नेताहरू बसेर सर्वसम्मति भन्दै महाधिवेशन प्रतिनिधिको नाम घोषणा गरेका थिए।
एमालेको केन्द्रीय समिति र विभागका पदाधिकारी तथा सदस्यहरू स्वत: महाधिवेशन प्रतिनिधि हुन्छन्। उनीहरू भूगोलबाट चुनिएर जानुपर्दैन। गण्डकी प्रदेशबाट एमालेका पदाधिकारी, केन्द्रीय सदस्य र विभागमा पुगेका ५० जना स्वत: महाधिवेशन प्रतिनिधि बन्ने छन्।
पार्टी पदाधिकारी, केन्द्रीय सदस्य, विभागीय सदस्य लगायत भूगोलबाट चुनिएका गरी गण्डकीबाट १८७ जना महाधिवेशन प्रतिनिधिले भाग लिन पाउनेछन्।
***
-1746009348.jpg)
