संसद पुनर्स्थपानाका लागि अदालत गएको नेकपा एमालेले प्रतिनिधि सभा निर्वाचनका लागि तलबाट उम्मेदवारहरूको नाम माग्न थालेको छ।
एमालेले फागुन २१ गते हुने प्रतिनिधि सभा निर्वाचनका लागि समानुपातिकतर्फ उम्मेदवारहरूको नाम माग्न थालेको हो।
यद्यपि एमालेले सचिवालयको बैठक भने राखेको छैन।
मंसिर २७ देखि पुस ३ गतेसम्म एमालेले ११ औं महाधिवेशन आयोजना गरेको थियो।
महाधिवेशनमा व्यस्त भएकाले र भर्खरै मात्र नयाँ कमिटी निर्वाचित भएर आएकाले तत्काल बैठक राख्न नसकेको सचिव राजन भट्टराईले जानकारी दिए।
उनका अनुसार मातहतका कमिटीले समानुपातिकतर्फ उम्मेदवारहरू भने सिफारिस गरिरहेका छन्। केन्द्रीय कार्यालयले नामहरूको रोस्टर पनि तयार पारिरहेको छ।
फागुन २१ गते हुने प्रतिनिधि सभा निर्वाचनका लागि दलहरूले आगामी पुस १३ र १४ गते बन्द सूची पेस गनुपर्ने छ। दलहरूले विभिन्न क्लस्टर मिलाएर अधिकतम ११० जनाको सूची बुझाउनुपर्ने हुन्छ।
प्रतिनिधि सभा विघटनविरूद्ध रिट बोकेर अदालत गएका नेपाली कांग्रेस, नेकपा एमाले लगायत दलहरूले चुनावी प्रयोजनका लागि दल दर्ता गरेका छन्। उनीहरूले बन्द सूची बुझाउने पनि तयारी गरेका छन्। कांग्रेसले औपचारिक विधिबाटै नाम मागिरहेको छ। एमालेले पनि महासचिव पोखरेलमार्फत् नाम मागिरहेको भट्टराईले बताएका छन्।
‘तल्ला (तहगत) कमिटीहरूबाट समानुपातिकका लागि उम्मेदवारहरूको नाम आइरहेको छ। जिल्ला कमिटीहरूले नाम पठाइरहेका छन्,’ उनले सेतोपाटीसँग भने, ‘सचिवालयको औपचारिक बैठक नबसे पनि यसबीचमा छलफल भइरहेका छन्। अनौपचारिक कुराकानी पनि भइरहेका छन्।’
एमालेका नवनिर्वाचित अर्का सचिवले पनि पार्टीले औपचारिक रूपमै उम्मेदवारहरूको नाम मागेर रोस्टर बनाइरहेको बताए। ‘पार्टीले नाम मागेर रोस्टर बनाएको छ, बन्द सूची बुझाउने तयारी छ,’ उनले भने।
सचिवालयको बैठक नराखी तलबाट नाम माग्न थालिएको भन्दै सचिवालय सदस्यहरूले नै विरोध जनाउन थालेका छन्।
उपमहासचिव योगेश भट्टराईले मंगलबार पार्टी महासचिव शंकर पोखरेललाई बैठक राख्न ध्यानाकर्षण गराएको जानकारी दिए।
‘फागुन २१ गते प्रतिनिधि सभा चुनाव हुँदैछ, पुस १३ र १४ मा समानुपातिक सूची बुझाउने कार्यतालिका छ, माघ ६ गते प्रत्यक्ष तर्फ उम्मेदवारी दर्ताको कार्यतालिका छ, माघ ११ मा राष्ट्रिय सभा चुनाव छ, यी सबैका लागि कमिटी बैठक राखेर पहिला पहिला नाम माग्ने गरिन्थ्यो,’ योगेशले पोखरेललाई भनेका थिए, ‘यसपालि केही तयारी गरिएको औपचारिक जानकारी छैन, त्यसैले सचिवालय बैठक राख्नुपर्यो, छलफल गर्नुपर्यो।’
महासचिव पोखरेलबाट यसको ठोस जबाफ भने नपाएको भट्टराईले बताए।
एमालेले आगामी पुस २६ देखि २८ गतेसम्म दोस्रो केन्द्रीय कमिटी बैठक राखेको छ। त्यसको कार्यसूची र केन्द्रीय कमिटीमा पेस गर्नुपर्ने प्रस्तावबारे छलफल गर्न यसबीचमा पहिलो सचिवालय बैठक बोलाउने एमाले तयारी छ।
सम्भवतः यही बैठकमा एमालेले प्रत्यक्ष र समानुपातिकतर्फका उम्मेदवारहरूको नाम तलबाट माग्नेछ।
उनले सामाजिक सञ्जाल फेसबुकमै लेखेर यसबारे ध्यानाकर्षण गराएको बताएका छन्।
‘प्रतिनिधि सभाको निर्वाचनमा समानुपातिक उम्मेदवारको नाम पेस गर्नु पर्ने समय नजिक आइसकेको छ। पार्टीको बैठक बसेर मापदण्ड बनाएर तहगत कमिटीलाई उम्मेदवार सिफारिस गर्न निर्देशन गर्नु पर्ने छ। महासचिव शंकर पोखरेललाई फोन मार्फत् यो विषय ध्यानाकर्षण गरेको छु,’ उनले भनेका छन्।
तलबाट प्रत्यासीको नाम माग्न थालिएकाप्रति एमाले नेता गोकुल बास्कोटाले पनि कटाक्ष गरेका छन्। महाधिवेशनमा सचिवका प्रत्यासी रहेर पराजित बास्कोटाले मंगलबार नै स्ट्याटस लेख्दै चुनावमा भाग नलिने भन्ने तर खुसुखुसु नाम माग्न थालेको भन्दै कटाक्ष गरेका छन्।
‘चुनाव हुँदैन पनि भन्छन् दलहरू फेरि आफै खुसुखुसु समानुपातिक सदस्यको नाम पनि बटुल्दै रहेछन्। कुन पत्याउनु हो? लाखे,’ उनले व्यंग्यात्मक शैलीमा लेखेका थिए।
-1746009348.jpg)
