राष्ट्रिय सभा निर्वाचनको चुनावी तालमेलबाट नेपाली कम्युनिस्ट पार्टी (नेकपा) बाहिरिएको छ। मंगलबार राति भएको छलफलमा सिट बाँडफाँटमा कुरा नमिलेपछि नेकपा बाहिरिएको हो।
छलफलमा सहभागी नेपाली कांग्रेस नेता रमेश लेखकका अनुसार नेकपाले चार सिट दाबी गरेको थियो। नेपाली कांग्रेस र नेकपा एमालेले नेकपालाई तीन सिटको प्रस्ताव गरेका थिए।
तर नेकपाले आफूहरूको मतभारअनुसार चार सिट पाउनुपर्ने अडान नछाडेपछि कुरा बिग्रिएको लेखकले बताए।
‘खोई उहाँहरूले अहिले नगरौं भन्नु भयो, हामीले मतभारभन्दा एक सिट कम लिएकाले उहाँहरूलाई पनि मतभार भन्दा कम लिन भनेर एमालेलाई मतभार भन्दा एक सिट थप्ने भन्ने कुरा गरेका थियौं, उहाँहरूले मान्नुभएन,’ उनले भने, ‘अब कांग्रेस एमाले र मधेसबाट महन्थ ठाकुरलाई दिने भन्ने कुरा भएको छ।’
नेकपा नेता अग्नि सापकोटाले आफ्नो मतभार अनुसार राष्ट्रिय सभामा चार सिट दाबी गरेको र त्यसमा कुरा नमिलेको बताए। ‘हामीले मतभार अनुसार ४ सिटमा दाबी गरेका थियौं। तर उहाँहरू मान्नुभएन,’ उनले भने।
नेकपासँग कुरा नमिलेपछि कांग्रेस–एमालेले जनता समाजवादी पार्टी नेपाललाई जोड्ने प्रयास गरेका छन्। जसपा नेपालका तर्फबाट महन्थ ठाकुरलाई एक सिट दिने गरी कांग्रेसले ९, एमालेले ८ लिने सहमति करिब टुंगो लागेको लेखकले बताए।
जसपा नेपाल तालमेलमा नआए कांग्रेसले १० र एमालेले ८ सिट पाउने छ।
त्यहीअनुसार एमालेले उम्मेदवार पनि टुंग्याइसकेको छ।
एमाले सचिव महेश बस्नेतका अनुसार कोशीमा एमालेले टुई सिट पाएको छ। जसअनुसार सोमनाथ पोर्तेल र रोशनी मेचे उम्मेदवार बन्ने छन्। मधेसमा एमालेलाई उम्मेदवार टुंग्याउन सकस परेको छ। बागमतीबाट एमालेले प्रेम दंगालको नाम टुंगो लगाएको छ।
गण्डकीमा सम्झना देवकोटा उम्मेदवार बन्ने छिन्। लुम्बिनीमा रामकुमारी झाक्री, कर्णालीमा मीनासिंह रखाल र सुदूरपश्चिममा लीला भण्डारीलाई उम्मेदवार बनाउने टुंगो लगाएको छ।
को हुन् उम्मेदवार बन्न लागेका?
कोशीबाट उम्मेदवार बन्न लागेकी रोशनी मेचे लोपोन्मुख समुदायकी हुन्। उनी यसअघि एमाले अध्यक्ष केपी शर्मा ओली प्रधानमन्त्री हुँदा उनको सचिवालयमा थिइन्। उम्मेदवार बन्न लागेको सोमनाथ पोर्तेल लामो समयदेखि दलित आन्दोलनसँग जोडिएका नेता हुन्। उनी २०७४ सालमा झापाको जिल्ला समन्वय समिति प्रमुख थिए।
बागमतीबाट उम्मेदवार बन्न लागेका दंगाल कर्मचारी आन्दोलनबाट राजनीतिमा आएका हुन्। कर्मचारी आन्दोलनका कारण उनले २०४८ सालमा जागिर गुमाएका थिए। त्यसपछि उनी एमालेमा निरन्तर क्रियाशील छन्। उनी लामो समय एमालेनिकट किसान महासंघमा क्रियाशील थिए। उनी किसान महासंघका अध्यक्षसमेत भइसकेका हुन्। दंगालले युवा स्वरोजगार कोष, किसान आयोगजस्ता संस्थामा नेतृत्व गरिसकेका छन्।
गण्डकीबाट उम्मेदवार बन्न लागेकी सम्झना देवकोटा त्यहाँकी पार्टी सचिवसमेत रहिसकेकी छन्। उनी केन्द्रीय पार्टी संगठन विभागको सचिव पनि बनेकी थिइन्। स्थानीय तह निर्वाचनमा उनी गोरखाको उपमेयरमा पराजित भएकी थिइन्।
लुम्बिनीबाट उम्मेदवार बन्न लागेकी रामकुमारी झाक्री एकीकृत समाजवादीबाट माओवादीसँगको एकता प्रक्रियामा समाहित नभइ एमालेमा फर्किएकी थिइन्। २०७४ सालमा प्रतिनिधि सभा सदस्य बनेकी झाक्री गत महाधिवेशनबाट एमालेका लोकप्रिय मतसहित केन्द्रीय सदस्य निर्वाचित भएकी हुन्। कर्णालीबाट उम्मेदवार बन्न लागेकी रखाल २०७४ सालमा कर्णाली प्रदेश सभा सदस्य थिइन्। उनी एमाले केन्द्रीय सदस्य हुन्।
सुदूरपश्चिमबाट उम्मेदवार बन्न लागेकी लीला भण्डारी पूर्वमाओवादी पृष्ठभूमिकी हुन्।
-1746009348.jpg)
