नेकपा एमालेले अध्यक्ष केपी शर्मा ओलीलाई नै भावी प्रधानमन्त्रीका रूपमा प्रस्तुत गर्दै उम्मेदवार टुंगो लगाएको छ। यसरी उम्मेदवार तय गर्दा एमालेले केही नयाँ अनुहार पनि समेटेको छ।
यस अनुसार कैलाली–१ बाट द्वारिका न्यौपाने समेटिएका छन् भने कैलाली–२ बाट सूर्यबहादुर थापा उम्मेदवार बन्ने भएका छन्। यहाँ झपट रावल उम्मेदवार बन्दै आए पनि यसपालि एमालेले उनलाई पाखा लगाएको छ।
त्यस्तै, कैलाली–५ मा यज्ञराज ढुंगाना उम्मेदवार बन्ने भएका छन्। उनी प्रदेशको राजनीतिमा सक्रिय छन्।
कञ्चनपुर–१ मा तारा लामा तामाङलाई टिकट नदिएर एमालेले कमला बोहरालाई अघि सारेको छ। उनी पनि नयाँ अनुहार हुन्। विद्यार्थी राजनीतिबाट आएकी उनले बलियो मताधारको प्रतिनिधित्व गर्ने दाबी गर्दै उम्मेदवार बनाएको एमालेको दाबी छ।
कञ्चनपुर–२ मा बचनबहादुर सिंह उम्मेदवार बनेका छन्। अछाम–२ का यज्ञ बोगटी भने नयाँ अनुहार हाेइनन्।
डोटीबाट उम्मेदवार बनाइएका दीपक धामी नयाँ अनुहार हुन्। धामी एमालेको विद्यार्थी संगठन अनेरास्ववियुका अध्यक्ष पनि हुन्। गत महाधिवेशनबाट महासचिव निर्वाचित भएका धामी डा. सुजन कडरियाले राजीनामा दिएपछि अध्यक्ष मनोनीत भएका थिए।
डडेल्धुराबाट उम्मेदवार बनेका चक्र स्नेही यसअघि राष्ट्रियसभा सदस्य थिए। बझाङमा एमालेले ऐन महरलाई टिकट नदिएर अफिलाल ओखेडा अघि सारेको छ। उनी पनि समानुपातिक सांसद भइसकेका हुन्।
बैतडीमा दामोदर भण्डारी र दार्चुलामा गणेशसिंह ठगुन्ना पुरानै अनुहार दोहोरिएका छन्। रूकुम पश्चिमबाट उम्मेदवार बनेका नन्दराम देवकोटा यसअघि पराजित भएका थिए।
कालिकोटमा उम्मेदवार बनेका नागेन्द्र शाही (नेसनल) पनि यसअघि पराजित थिए। जुम्लाका शान्तिलाल महत भने नयाँ अनुहार हुन्। मुगुका पूर्णबहादुर रोकाया पनि नयाँ अनुहार नै हुन्।
डोल्पाका लंक रोकाया नयाँ अनुहार हुन्। जाजरकोटका डम्मरबहादुर सिंह भने २०७० को संविधान सभा निर्वाचनमा पराजित भएका थिए। जाजरकोटमा एमालेले यसपटक नीरज अचार्यलाई पनि टिकट दिएन।
नवलपरासी–१ मा रामप्रसाद पाण्डे र २ नम्बर क्षेत्रमा भगवतीप्रसाद यादव उम्मेदवार बनेका छन्। उनीहरू दुवै जना नयाँ अनुहार हुन्।
दाङ–१, २ मा महासचिव शंकर पोखरेलको इच्छा बुझेर अध्यक्षले टुंग्याउने निर्णय भएको छ। दाङ–२ पोखरेलको निर्वाचन क्षेत्र हो। अघिल्लो पटक उनी त्यहाँ पराजित भएका थिए। दाङ ३ मा घनश्याम पाण्डे उम्मेदवार हुने भएका छन्।
बर्दिया–१ सालिकराम अधिकारी नयाँ अनुहार हुन्। पाल्पा–१ मा नारायण आचार्य उम्मेदवार बन्ने भएका छन्। पाल्पा–२ मा उपाध्यक्ष विष्णुप्रसाद पोडेल उम्मेदवार बन्ने भएका छन्। त्यहाँ ठाकुर गैरेले यसअघिको निर्वाचन जितेका थिए। गैरेलाई पन्छाउँदै पौडेल सुरक्षित गर्न त्यहाँ उम्मेदवार बनाइएको हो।
रूकुमपूर्व अध्यक्ष ओलीले टुंग्याउने निर्णय गरेको छ। त्यहाँ नेपाली कम्युनिस्ट पार्टी (नेकपा) का अध्यक्ष पुष्पकमल दाहाल 'प्रचण्ड' उम्मेदवार बन्ने भएका छन्। एमालेले आज त्यहाँ उम्मेदवार टुंग्याएन।
नवलपुर–१ मा उम्मेदवार तोकिएका भागीरथ सापकोटा नयाँ अनुहार हुन्।
गोरखाका दुवै क्षेत्रमा एमालेले नयाँ अनुहार छानेको छ। १ नम्बर क्षेत्रमा विद्यार्थी आन्दोलनबाट आएका आरसी लामिछाने उम्मेदवार तोकिएका छन्। उनी अनेरास्ववियुको अघिल्लो महाधिवेशनमा अध्यक्षमा पराजित भएका थिए। अहिले पार्टी केन्द्रीय सदस्य छन्। २ नम्बर क्षेत्रमा गुण्डा नाइके मिलन गुरूङ उम्मेदवार बन्ने भएका छन्। विगतमा उनी मिलन चक्रेका नामबाट गुण्डागर्दीमा संलग्न हुन्थे।
स्याङ्जाका दुवै क्षेत्रमा एमालेले नयाँ अनुहार ल्याएको छ। क्षेत्र नम्बर १ मा मीनप्रसाद गुरूङ र २ मा खिमबहादुर थापा उम्मेदवार बन्ने भएका छन्।
कास्की–१ मा बैणबहादुर क्षेत्री पनि एमालेका नयाँ अनुहार हुन्। क्षेत्र नम्बर २ मा गत स्थानीय तह निर्वाचनमा पोखरा महानगरपालिकाको मेयरमा पराजित कृष्ण थापालाई एमालेले टिकट दिएको छ। ३ मा भने यसअघि नै सांसद जितेका दामोदर बैरागीलाई अघि सारिएको छ।
सिन्धुली–२ मा मनोजजंग थापालाई एमालेले अघि सारेको छ। उनी पनि नयाँ अनुहार नै हुन्।
रामेछाप–१ मा माधवप्रसाद ढुंगेल उम्मेदवार बनेका छन्। अनेरास्ववियु पूर्व अध्यक्ष, संगठन विभागका सचिव, अहिले केन्द्रीय सदस्य निर्वाचित ढुंगेल पनि नयाँ अनुहार हुन्।
सिन्धुपाल्चोक–१ मा एमालेले आङदोर्जे शेर्पालाई नयाँ अनुहारका रूपमा ल्याएको छ। त्यहाँ अरूण नेपाल, सरेश नेपाल यसअघि उम्मेदवार बन्दै आएका थिए। सिन्धुपाल्चोक–२ मा शेरबहादुर तामाङलाई नै एमाले अघि सारेको छ। उनी त्यो क्षेत्रमा २०५६ सालदेखि लड्दै आएका छन्।
काभ्रे–१ मा एमालेले अमित लामालाई टिकट दिएको छ। २ नम्बर क्षेत्रमा गोकुल बास्कोटालाई उम्मेदवार बनाउने निर्णय भएको छैन। लामा नयाँ अनुहार हुन्। धादिङ–२ मा एमालेले धनबहादुर घलेलाई नयाँ अनुहारका रूपमा अघि सारेको छ।
चितवन–१ मा कृष्णराज (कमल) पाठक, २ मा अस्मिन घिमिरे र ३ मा शंकरराज थपलिया उम्मेदवार बन्ने छन्। यी तिनै जना नयाँ अनुहार हुन्।
काठमाडौं–१ मा मोहन रेग्मी उम्मेदवार बन्ने भएका छन्। उनी पनि नयाँ उम्मेदवार हुन्।
काठमाडौं–६ मा प्रदेश सांसद अमनकुमार मास्के उम्मेदवार बन्नेछन्। उनी पनि संघीय संसदका नयाँ उम्मेदवार हुन्। क्षेत्र नम्बर ८ का राजेश शाक्य र १० का विनोद श्रेष्ठ यी दुवै प्रत्यक्षतर्फका नयाँ अनुहार हुन्। श्रेष्ठ मजदुर आन्दोलनमा सक्रिय छन्। एमालेनिकट मजदुर संगठनको अध्यक्ष पनि हुन्।
ललितपुर–१ मा एमालेले चेतनाथ सञ्जेललाई उम्मेदवार बनाएको छ। उनी पनि नयाँ अनुहार हुन्।
भक्तपुर–१ मा सोमप्रसाद मिश्र र २ मा महेश बस्नेत उम्मेदवार तय भएका छन्। त्यसमध्ये मिश्र नयाँ अनुहार हुन्। उनी चाँगुनारायण नगरपालिकाका पूर्व मेयर पनि हुन्।
सप्तरी– ४ बालकृष्ण चौधरी नवीन अनुहार नै हुन्। सिराहा–१ का केदार यादव, २ का नवीनकुमार यादव, ४ का बिल्टु यादव पनि एमालेले नयाँ उम्मेदवारकै रूपमा अघि सारेको छ।
महोत्तरी–२ मा रामपरिक्षण यादव पनि नयाँ उम्मेदवारका रूपमा छन्।
इलाम–१ मा काजिमान कागते उम्मेदवार बन्ने भएका छन्। यसअघि प्रदेश सांसद रहेका उनी संघीय सांसदका उम्मेदवारका रूपमा नयाँ अनुहार हुन्। इलाम–२ मा सुहाङ नेम्वाङ नै उम्मेदवार बन्नेछन्।
झापा–१ का रामचन्द्र उप्रेती, झापा–४ का मनोज ताम्ली, संखुवासभाका डा. अर्जुन कार्की नयाँ अनुहार हुन्।
सुनसरी–१ का सूर्य पन्दाक, मोरङ–२ का दिलीप बगेडिया, मोरङ–३ का दिलीप राई पनि नयाँ अनुहार नै हुन्। सोलुखुम्बुकी कल्पना राई पनि नयाँ अनुहार हुन्।
ओखलढुंगाबाट उम्मेदवार बनेकी अस्मिता थापा नयाँ अनुहार हुन्। उनी ओखलढुंगाको लिखु गाउँपालिकाको बहालवाला गाउँपालिका उपाध्यक्ष पनि हुन्। गत महाधिवेशनमा उनी केन्द्रीय सदस्य निर्वाचित भएकी थिइन्।
उदयपुर–१ की दुर्गा थापा स्वोती उम्मेदवारका रूपमा नवीन अनुहार हुन्। खोटाङका देवविक्रम राईलाई एमालेले नयाँ उम्मेदवारका रूपमा छानेको छ।
-ink-1768644050.jpeg)
-1746009348.jpg)
