२०७९ को निर्वाचनमा समानुपातिकतर्फ महोत्तरी क्षेत्र नम्बर १ मा नेकपा (माओवादी केन्द्र) पहिलो बन्यो। तर प्रत्यक्षतर्फ माओवादी उमेदवार गिरिराजमणि पोखरेल पराजित भए।
२०६४, २०७० र २०७४ को निर्वाचमा जितेका पोखरेल पहिलो पटक पराजित हुन पुगे। जबकि पोखरेललाई नेपाली कांग्रेस सहितको गठबन्धनको समर्थन थियो।
एमाले-जसपा गठबन्धनको तर्फबाट एमालेका उमेदवार लक्ष्मी महतो कोइरीले २३ हजार ४ सय २ मत ल्याउँदा पोखरेलले २२ हजार ३ सय ७२ मत ल्याएका थिए।
तेस्रो मत स्वतन्त्र उमेदवार पोषणबहादुर थापाले ७ हजार ८ सय १२ मत ल्याए भने जनमत पार्टीका राजकिशोर साहले ३५ सय ९८ मत ल्याएका थिए।
राष्ट्रिय स्वतन्त्र पार्टी (रास्वपा) का खेमकुमारी भुर्तेलले २ हजार ६४ मत ल्याएकी थिइन्।
समानुपातिकतर्फ भने माओवादीले १५ हजार ३ सय ९४, एमालेले १२ हजार १ सय ६७, जनमत पार्टीले ७ हजार ४ सय ४४ मत ल्याएको थियो। रास्वपाले ६ हजार १ सय २६ मत ल्याउँदा कांग्रेसले ४ हजार ७ सय ४८ मत पाएको थियो।
जसपाले ३ हजार ९ सय ७८ मत ल्याएको थियो।
यो क्षेत्रमा बर्दिवास नगरपालिका, गौशाला नगरपालिका र भँगाहा नगरपालिकाको वडा नम्बर ३, ४, ५ र ९ (४ वटा वडा) पर्छन्।
३० वटा वडामध्ये कांग्रेसले ७, माओवादी केन्द्र र जसपाले ६-६ वडा जितेका थिए भने लोसपाले ४, स्वतन्त्र उमेदवारले ४ र एमालेले ३ वडा जितेको थियो।
तीन पटक जित र एक पटक हार बेहोरेका ६८ वर्षीय पोखरेल फागुन २१ गते हुने प्रतिनिधि सभा निर्वाचनका लागि नेकपाबाट उमेदवार छन्।
पोखरेलसँगै प्रतिस्पर्धामा छन्- एमालेका लक्ष्मी महतो कोइरीलगायत विभिन्न दलका उम्मेदवारहरू।
यो क्षेत्रमा नेपाली कांग्रेसबाट मुकेशकुमार काफ्ले, रास्वपाका प्रमोदकुमार महतो, जसपाका योगनारायण महतो, जनमत पार्टीका वीरेन्द्र महतोसहित २५ जना उमेदवार छन्।
जनमोर्चा पृष्ठभूमिका पोखरेल २०६३ मा गिरिजाप्रसाद कोइराला नेतृत्वको अन्तरिम सरकारमा स्वास्थ्य मन्त्री बनेका थिए।
२०६४ को निर्वाचनमा पोखरेलले तत्कालीन जनमोर्चा नेपालबाट निर्वाचन जितेका हुन्। त्यो निर्वाचनमा माओवादी र जनमोर्चाको बीचमा चुनावी तालमेल भएको थियो।
संविधान सभा निर्वाचनपछि बनेको पुष्पकमल दाहाल 'प्रचण्ड' नेतृत्वको सरकारमा पोखरेल स्वास्थ्य मन्त्री थिए।
माओवादीसँग एकता भएर नेकपा एकीकृत माओवादी बनेको थियो। पोखरेलले २०७० मा नेकपा एकीकृत माओवादीको तर्फबाट सोही क्षेत्रमा निर्वाचन जिते।
२०७२ सालमा तत्कालीन केपी शर्मा ओली नेतृत्वको सरकारमा पोखरेल शिक्षा मन्त्री बनेका थिए। २०७४ सालमा बनेको शेरबहादुर देउवा नेतृत्वको सरकारमा उनी स्वास्थ्य मन्त्री बने।
२०७४ मा भएको निर्वाचमा पोखरेल तेस्रो पटक निर्वाचित भए। २०७४ फागुनमा उनले पाँचौ पटक मन्त्री बन्ने अवसर पाए।
त्यो बेला पोखरेल झण्डै तीन वर्ष मन्त्री बनेका थिए।
२०६२-०६३ पछि लगातार अवसर पाउने नेतामा पर्छन, पोखरेल। उनले जति अवसर बिरलै नेताले पाएका छन्।
पटक पटक गरेर ५ पटक मन्त्री बनेका पोखरेलका लागि अर्को अवसर के हो भने उनले शिक्षा र स्वास्थ्य जस्ता आकर्षक मन्त्रालय पालैपालो चलाउन पाएका थिए।
-1746009348.jpg)
