२०७९ को निर्वाचनमा सप्तरी क्षेत्र नम्बर २ बाट पराजित भएका जनता समाजवादी पार्टी नेपाल (जसपा) अध्यक्ष उपेन्द्र यादव केही समयपछि बारामा भएको उपनिर्वाचनमा विजयी भए।
बारा क्षेत्र नम्बर २ बाट निर्वाचन जितेका रामसहायप्रसाद यादव उपराष्ट्रपति बनेपछि रिक्त स्थानका लागि उपनिर्वाचन भएको थियो।
जसपाका तत्कालीन महासचिवसमेत रहेका रामसहायप्रसाद यादव उपेन्द्रका विश्वासिला पात्र थिए। त्यही भएर उपेन्द्रले आफ्नो भागमा परेको उपराष्ट्रपतिमा रामसहायलाई पठाएर आफू उपनिर्वाचन लड्न गएका थिए।
२०७९ मंसिरमा भएको निर्वाचनमा एमालेसँग गठबन्धन गरेको जसपाले २०८० वैशाखमा भएको उपनिर्वाचनमा नेपाली कांग्रेस र नेकपा माओवादी केन्द्र सहितका दलसँग गठबन्धन गरेको थियो।
उपनिर्वाचनमा बाराबाट जितेको भए पनि यसपालि उपेन्द्र फेरि सप्तरी फर्किएका छन्। यसपटक उनी सप्तरी क्षेत्र नम्बर ३ मा उम्मेदवार छन्।
उपेन्द्रसँगै यो क्षेत्रमा कांग्रेसका दिनेशकुमार यादव, नेकपा एमालेका ताराकान्त चौधरी, नेकपाका अरुणकुमार साहले उमेदवारी दिएका छन् भने रास्ट्रिय स्वतन्त्र पार्टी (रास्वपा) का अमरकान्त चौधरी र जनमत पार्टीका सुरेन्द्रप्रसाद शर्मा सहित २७ जनाले यो क्षेत्रबाट उमेदवारी दिएका छन्।
२०७९ को निर्वाचनमा यो क्षेत्रबाट तत्कालीन सत्ता गठबन्धनको समर्थनमा उमेदवार बनेर काग्रेसका दिनेशकुमार यादव विजयी भएका थिए। यादवले २६ हजार १ सय ६६ मत ल्याउँदा जसपाको समर्थनमा उमेदवार बनेका एमालेका ताराकान्त चौधरीले २२ हजार ३ सय मत ल्याएका थिए।
तेस्रोमा रहेका जनमत पार्टीका अनिश अंसारीले १५ हजार १ सय १४ मत पाएका थिए।
समानुपातिकतर्फ भने सबैभन्दा धेरै मत जनमत पार्टीले १८ हजार ३ सय ४० ल्याएको थियो।
दोस्रोमा कांग्रेसले १८ हजार २ सय ४८ मत ल्याएको थियो। जसपाले १० हजार १ सय ५३ मत ल्याउदा एमालेले ९ हजार ५ सय ९४ मत ल्याएको थियो।
नागरिक उन्मुक्ति पार्टीले ३ हजार मत ल्याउदा माओवादीले १७ सय मात्र ल्याएको थियो। लोसपाको १६ सय र नेकपा एकीकृत समाजवादीको १२ सय थियो। लोसपा र जसपा अहिले एक भएका छन् भने माओवादी र नेकपा एकीकृत समाजवादीलगायत दल र घटक मिलेर नेकपा बनेको छ।
२०७४ को निर्वाचनमा भने यो क्षेत्रमा तत्कालीन राष्ट्रिय जनता पार्टी (राजपा) को तर्फबाट चन्द्रकान्त चौधरी विजयी भएका थिए। त्यो निर्वाचनमा उपेन्द्र यादव नेतृत्कको संघीय समाजवादी फोरम र राजपाका विचमा गठबन्धन भएको थियो।
यो क्षेत्रमा सप्तरीका रूपनी गाँउपालिका, शम्भुनाथ नगरपालिका, विष्णुपुर गाँउपालिका, राजगढ गाँउपालिका र डाक्नेश्वरी नगरपालिकाका ४१ वडा पर्छन्। तीमध्ये सबैभन्दा धेरै कांग्रेसले १२ वडा जितेकोछ। जसपाले १०, एमालेले ७ र नेकपा एकीकृत समाजवादीले ५ वडा जितेको छ। लोसपाले ४ र माओवादी केन्द्रले ५ वडा जितेको छ।
जसपा र लोसपा एक भएकाले त्यसको फाइदा यादवलाई पुग्न सक्छ भने माओवादी र एकीकृत समाजवादी एकताको केही फाइदा नेकपाका उमेदवार अरुणकुमार साहलाई हुन सक्छ।
यसपालि सप्तरी क्षेत्र नं ३ बाट किन उम्मेदवारी भन्ने हाम्रो प्रश्नमा जसपाका अध्यक्ष उपेन्द्र यादवले जुन ठाउँबाट उमेदवार भए पनि जनताकै सेवा गर्ने भएकाले यसलाई सामान्य ठान्नुपर्ने प्रतिक्रिया दिए।
'सप्तरी मेरो घर हो। त्यसैले कुन क्षेत्रमा उठ्ने-नउठ्ने भन्ने ठूलो कुरा होइन। बाराबाट पनि मलाई साथीहरूले बोलाउनु भएको थियो। म त्यहाँका जनतासँग असाध्यै कृतघ्न छु,' यादवले सेतोपाटीसँग भने, 'कुन जिल्लाको कुन क्षेत्रमा उमेदवार बन्यो भन्नेले ठूलो अर्थ राख्दैन। जहाँ गए पनि देश र जनताकै सेवा गर्ने हो।'
२०६४ सालदेखि भएका सबै निर्वाचन जित्दै आएका यादव सुरूमा मोरङ ५ र सुनसरी ५ बाट विजयी भएका थिए।
२०७० मा भएको दोस्रो संविधानसभा निर्वाचनमा मोरङबाट पराजित भएका यादव सुनसरीबाट भने विजयी भए।
०७४ मा उनी सप्तरी क्षेत्र नम्बर २ बाट विजयी भएका थिए।
२०४८ सालमा तत्कालीन एमालेबाट सुनसरी ४ को उमेदवार बनेका यादव २०५४ सालको स्थानीय निर्वाचनपछि एमालेमा निस्क्रिय बने।
०५४ मा मधेसी जनअधिकार फोरम नामक गैरसरकारी संस्था स्थापना गरेका यादव केही समय माओवादी 'जनयुद्ध'मा समेत सहभागी थिए।
मधेसी जनअधिकार फोरम गठन भएदेखि नेतृत्वमा रहेका यादव २०६४ को संविधान सभा निर्वाचन अघि निर्वाचन आयोगमा दर्ता हुँदै अहिलेको जसपासम्म आइपुग्दा उनी नै नेतृत्वमा छन्।
२०६४ मा संसद छिरेदेखि अहिलेसम्म यादव ४ पटक सरकारमा गएका छन्। उनले दुई पटक परराष्ट्र, दुई पटक स्वास्थ्य र केही समय कानुन मन्त्रालयको नेतृत्व सम्हालेका थिए।
* बारा २ हुनुपर्नेमा यसअघि अन्यथा भएकोमा सच्याइएको छ। -सम्पादक।
-1746009348.jpg)
