२०७९ सालको प्रतिनिधिसभा निर्वाचनमा समानुपातिकतर्फ पहिलो पार्टी बनेको नेकपा एमाले यसपटक तेस्रोमा खुम्चिन पुगेको छ।
अघिल्लो पटक २८ लाख ४५ हजार ६४१ मत ल्याएको नेकपा एमालेले यसपटक झन्डै आधा हिस्सा गुमाउँदै १४ लाख ५५ हजार ८८५ मत ल्याएको छ।
प्रत्यक्षतर्फ त ऊ झनै खुम्चन पुग्यो। अघिल्लो निर्वाचनमा प्रत्यक्षतर्फ ४४ स्थानमा जित हासिल गरेको एमालेले यसपटक ९ स्थान मात्र जित्यो। एमालेले यसपटक ताप्लेजुङ, इलाम–२, संखुवासभा, धनकुटा, बाँके–२, दैलेख–२, अछाम–२, बझाङ, दार्चुलाबाहेक अन्यत्र जित निकाल्न सकेन।
निर्वाचन आयोगको विवरण अनुसार नेकपा एमाले ४१ स्थानमा निकटतम प्रतिस्पर्धी अर्थात् दोस्रो बन्यो। एमाले झापा–२, ४, ५, तेह्रथुम, भोजपुर, मोरङ–२, खोटाङ, उदयपुर–२ मा दोस्रो बन्यो।
त्यस्तै, सिराहा–३, रौतहट–१, बारा–४, पर्सा–१, दोलखा, रामेछाप, सिन्धुली–१, धादिङ–१, भक्तपुर–२, मकवानपुर–२, लमजुङ, कास्की–२, नवलपुर–२, मुस्ताङ, म्याग्दीमा पनि दोस्रो बन्यो। गुल्मी–१ र २, पाल्पा–१, अर्घाखाँची, रूपन्देही–२, ४, ५, रूकुमपूर्व, दाङ–२ मा पनि एमाले दोस्रो बन्यो।
बाँके–३, बर्दिया–१, डोल्पा, मुगु, कालिकोट, दैलेख–१, सुर्खेत–१, बाजुरा, डोटीमा पनि दोस्रो बन्यो।
निर्वाचन परिणाम अनुसार एमाले ६२ ठाउँमा तेस्रो भएको छ भने ४२ स्थानमा चौथो भयो।
मोरङ–५, उदयपुर–१, सप्तरी–४, रौतहट–२, नवलपरासी बर्दघाट सुस्तापूर्व–२, कैलाली–३ गरी ६ ठाउँमा तेस्रो बन्यो। मधेस प्रदेशअन्तर्गत सप्तरी–२, महोत्तरी–३, सर्लाही–२ मा एमाले सातौं भयो।
एमालेले यो निर्वाचनमा झापा, मोरङ, सुनसरी लगायत तराई–मधेसको ठूलो मताधार गुमायो। काठमाडौं उपत्यका लगायत सहरी क्षेत्रको मताधार गुमाएको छ। ती स्थानका निर्वाचन क्षेत्रमा एमालेका उम्मेदवारहरूलाई धरौटी जोगाउन पनि सकस देखियो।
झापा–१, झापा–३, मोरङ–३, ४, ५, ६, सुनसरी–१, २, ४, सप्तरी–२, ३, ४, सिराहा–२, ४, महोत्तरी १, २, ३, सर्लाही १, २, ३, रौतहट–२, ३, ४, बारा–३, काठमाडौं–१, २, ३, ५, ७, ८, ९, १०, भक्तपुर–१, ललितपुर–२, ३, चितवन–२, ३, गोरखा–१, २, तनहुँ–१, रूपन्देही–१, ३, कपिलवस्तु–२, दाङ–१, नवलपरासी–१, २, कैलाली–१, ३, डडेलधुरा गरी ४९ स्थानमा एमालेको जमानत जफत भएको छ।
उम्मेदवारी दर्ता गर्न निर्वाचन आयोगले १० हजार रुपैयाँ दस्तुर लिने गर्छ। कुल सदर मतको १० प्रतिशत कटाउने उम्मेदवारले जमानत बापतको उक्त रकम फिर्ता पाउँछन्। उक्त मत नकटाउने उम्मेदवारको १० हजार रूपैयाँ जफत हुन्छ। धरौटी जफत त्यसैलाई भनिएको हो।
२०७९ सालको निर्वाचनमा एमालेको प्रत्यक्ष र समानुपातिक गरी ७८ जना सांसदको प्रतिनिधित्व थियो। निर्वाचन आयोगको अद्यावधिक विवरणअनुसार आगामी संसदमा एमालेको २५ सांसदको प्रतिनिधित्व रहने देखिएको छ। एमालेका ९ जना उम्मेदवार प्रत्यक्ष जितेका छन्। समानुपातिकबाट १६ जनाको प्रतिनिधित्व रहने देखिएको छ।
-1746009348.jpg)
