प्रतिनिधिसभा निर्वाचनले नेकपा एमालेलाई २५ सिटमा खुम्च्याएपछि संसदीय दलको नेता युवा बनाउनुपर्ने बहस पार्टीभित्र उठ्न थालेको छ।
एमालेभित्र प्रत्यक्ष चुनाव जितेर आएका तीन जना युवा सांसद छन्। ताप्लेजुङबाट क्षितिज थेवे, बझाङबाट ऐन महर र इलाम–२ बाट सुहाङ नेम्वाङ प्रत्यक्ष निर्वाचित भएका युवा अनुहार हुन्। उनीहरूमध्ये एक जनालाई संसदीय दलको नेता बनाउनुपर्ने कतिपय नेताको तर्क छ। यसबाहेक समानुपातिकबाट सांसद बनेकी पद्मा अर्यालको नाम पनि चर्चामा छ।
प्रतिनिधिसभा निर्वाचनमा पार्टी अध्यक्ष केपी शर्मा ओलीसहित ११ पदाधिकारी प्रत्यक्षतर्फ उम्मेदवार थिए। तर कसैले पनि चुनाव जितेनन्।
अध्यक्ष ओली, उपाध्यक्षहरू विष्णु पौडेल, पृथ्वीसुब्बा गुरूङ, गोकर्ण विष्ट, महासचिव शंकर पोखरेल, उपमहासचिव लेखराज भट्ट, रघुवीर महासेठ, सचिव शेरधन राई, राजन भट्टराई, भानुभक्त ढकाल र महेश बस्नेत उम्मेदवार थिए। यी सबै पराजित भए।
पूर्वपदाधिकारी ईश्वर पोखरेल र प्रदीप ज्ञवालीले पनि चुनाव जित्न सकेनन्।
अहिले समानुपातिकबाट पहिलो वरीयताका उपाध्यक्ष रामबहादुर थापा 'बादल', सचिव पद्मा अर्याल सांसद बनेका छन्। त्यस्तै पूर्वउपाध्यक्ष गुरू बराल पनि सांसद बनेका छन्।
प्रत्यक्ष जितेकामध्ये धनकुटाबाट निर्वाचित राजेन्द्र राई, दार्चुलाबाट निर्वाचित गणेशसिंह ठगुन्ना वरिष्ठमध्येका हुन्।
अध्यक्ष ओली पिता मोहनप्रसाद ओलीको शोकमा छन्। उनी पितृशोकबाट नउत्रिसकेकाले संसदीय दलको नेता चयनको विषयमा कुनै छलफल नभएको सचिव पद्मा अर्यालले जानकारी दिइन्।
'अध्यक्ष शोकबाट उत्रिसक्नुभएको छैन। उहाँ पितृशोकबाट बाहिर आएपछि मात्र यसबारे छलफल होला। सांसदको शपथलगत्तै हामी दलको बैठक बसेर नेता चयन गरिहाल्छौं,' उनले भनिन्।
एमाले नेताहरूका अनुसार अध्यक्ष ओलीले बादललाई नै संसदीय दलको नेता बनाउन चाहेका छन्। २०७७ पुस ५ गते संसद विघटनपछि ओलीलाई साथ दिँदै आएका बादल पूर्वमाओवादी खेमाबाट एमालेमा रहने वरिष्ठ नेतामध्ये हुन्।
गत महाधिवेशनमा पनि बादलले लोकप्रिय मत ल्याएका थिए। अहिले उनैलाई दलको नेता बनाउनुपर्नेमा ओलीको जोडबल छ।
तर पछिल्लो निर्वाचन परिणाम राजनीतिक पुस्तान्तरणको सन्देश पनि भएकाले त्यसको पालना गर्नुपर्ने आवाज एमाले पंक्तिभित्र उठिराखेको छ।
'निर्वाचन परिणामपछि संसदमा उल्लेख्य युवा अनुहार आएका छन्। राष्ट्रिय स्वतन्त्र पार्टीका तर्फबाट बालेन शाह प्रधानमन्त्री हुँदैछन्। राजनीतिक पुस्तान्तरणको यो माहोलमा एमालेले पनि त्यो सन्देश दिनुपर्छ भन्नेमा हामी छौं,' एमालेका एक नवनिर्वाचित सांसदले सेतोपाटीसँग भने।
एमालेका २५ सांसदमध्ये ५ जना (क्षितिज थेवे, सुहाङ नेम्वाङ, एशुदाकुमारी बराल, रिगला यादव, यशोधा कुमारी) ४० वर्ष र त्यसभन्दा मुनिका छन्। ऐनबहादुर महर ४१ वर्षका हुन्। रास्वपाबाट ३६ वर्षीय बालेन शाह प्रधानमन्त्री बन्न लागेकाले एमालेले पनि युवा अनुहार छान्नुपर्ने र तुलनात्मक रूपमा युवा पुस्तामा लोकप्रिय छवि बनाएका सुहाङ उपयुक्त पात्र हुन सक्ने एमालेका कतिपय नेताको तर्क छ।
सुहाङ यसअघिको उपनिर्वाचनमा पनि सांसद निर्वाचित भएका थिए। एमालेका तत्कालीन उपाध्यक्ष सुवास नेम्वाङको निधनपछि भएको उपनिर्वाचनमा सुहाङ सांसद निर्वाचित भएका थिए। सुहाङ सुवासका छोरा हुन्।
सचिव पद्मा अर्याललाई यसबारे सोध्दा उनले पछिल्लो समय अभिव्यक्त भएको भावनाबारे पार्टी जानकार रहेको बताइन्।
'पछिल्लो समयको सेन्टिमेन्ट पनि थाहा छ। तर हामी संसदीय दलको नेता चयनको विषयमा पुगेका छैनौं। अब बस्ने बैठकले त्यसको सम्बोधन गर्नेछ,' उनले भनिन्।
बझाङबाट निर्वाचित ऐन महरले पनि दलको नेता चयनबारे कुनै छलफल नभएको बताए।
'प्रत्यक्ष निर्वाचित सांसदहरू आ–आफ्नो निर्वाचन क्षेत्रमा छौं। हामी काठमाडौं फर्किएपछि यसबारे छलफल होला,' उनले भने।
संसद सचिवालयले नवनिर्वाचित सांसदहरूको शपथ चैत १२ गतेलाई तय गरेको छ। त्यसपछि दलहरूले दलको नेता चयन प्रक्रिया अघि बढाउनेछन्। रास्वपाले त्यही दिन बालेन शाहलाई दलका नेता चयन गरेर भोलिपल्ट प्रधानमन्त्रीको शपथ गराउने तयारी गरेको छ।
-1746009348.jpg)
