जेनजी आन्दोलनपछि अन्तरिम सरकार प्रमुख बनेको १९६औं दिनपछि थाप्लो हलुँगो पारेर सुशीला कार्की शुक्रबार घर फर्किइन्।
काठमाडौंको धापासीस्थित घर फर्किएकी सुशीला कार्कीलाई स्वागत गर्न 'पप्पी' निकै तलसम्म आइपुगेको थियो।
कार्की भदौ २७ गते मुलुकको ४२औं प्रधानमन्त्री नियुक्त भएकी थिइन्। त्यति बेला मुलुक आन्दोलनको भुंग्रोमा थियो। सिंहदरबारको थाप्लामाथि अनिश्चयको बादल मडारिएको थियो। संक्रमणकालको ताडनायुक्त समयमा प्रधानमन्त्रीको जिम्मेवारी सम्हालेकी कार्कीले कुशलतापूर्वक कार्यसम्पादन गरिन्। तोकिएकै मिति फागुन २१ गतेका दिन प्रतिनिधिसभा निर्वाचन भयो।
प्रतिनिधिसभा निर्वाचनले राष्ट्रिय स्वतन्त्र पार्टी (रास्वपा) का वरिष्ठ नेता बालेन शाहलाई प्रधानमन्त्री पदमा आसिन मात्र गराएन, सुशीला कार्कीलाई फुक्काफाल गरायो।
र, उनले १९६ दिनपछि परिवारको प्रिय सदस्य 'पप्पी' सँग भेट गर्न पाइन्।
प्रधानमन्त्री बहाल रहँदा कार्की धापासीमा रहेको आफ्नो निजी निवास जान पाएकी थिइनन्। श्रीमान् दुर्गा सुवेदी पनि बालुवाटारस्थित प्रधानमन्त्री निवासमै बसेकाले धापासीको घर कुर्ने जिम्मा त्यही पप्पीले नै पाएको थियो।
हुन त धापासीस्थित कार्की निवासमा सुरक्षा तैनाथी पनि थियो। केही आफन्तीले पनि रेखदेख गरेका थिए। तथापि घरको मूल खाँबो पप्पी नै थियो। उसले अविच्छिन्न घर रेखदेख गरिरहन्थ्यो।
झन्डै साढे सात महिना कार्की दम्पतीसँग देखभेट नहुँदा खुबै नियास्रिएको रहेछ, पप्पी।
बालुवाटारबाट लत्ताकपडा बिहीबार धापासी लगिसकिएको थियो। त्यसैले, पप्पीले प्राणप्रिय अभिभावक फर्कने सुइँको बिहीबारै पाइसकेको हुनुपर्छ।
शुक्रबार दिउँसो शीतल निवासबाट सुशीला कार्की जसै धापासीस्थित निजी निवास पुगिन्, पप्पीले ढोकामै पर्खने धैर्य गरेन। कार्की खोज्दै ऊ पनि लुखुरलुखुर तलतिर झर्न थाल्यो।
प्रधानमन्त्रीको कार्यकाल पूरा गरी घर फर्कन लागेकी कार्कीको स्वागतार्थ स्थानीयहरू पनि भेला भएका थिए। छरछिमेकी, आफन्त सहितको घञ्चमञ्च भीड घरछेउमा थियो। पप्पी भीड छिचोल्दै तल झरिरहेको स्थानीयले पनि देखेका थिए। तर कसैले ख्याल गरेनन्।
जसै उसको जम्काभेट कार्कीसँग भयो, उसले न्यानोपन देखाइहाल्यो।
'घरको जिम्मा नै कुकुरले लिएकोजस्तो रहेछ! उहाँ घर फर्कनुभएको थाहा पाउनासाथ तलै लिन आएको थियो,' कार्की प्रधानमन्त्री छँदा प्रेस सल्लाहकारको भूमिकामा रहेका राम रावलले सेतोपाटीसँग भने, 'सुशीला कार्कीलाई भेट्नेबित्तिकै परिवारको सदस्यसरह स्नेह प्रकट गर्यो। लुटपुटिन थाल्यो।'
'यता आइज। बिर्सिस् कि क्या हो, मलाई चिनिस्?' कार्कीले कुकुरलाई सुम्सुम्याउँदै भनिन्।
पप्पी पनि के कम थियो र! कुरो बुझेजस्तो भावभंगिमा देखायो।
कार्कीका श्रीमान दुर्गा पनि शुक्रबारै बालुवाटारबाट निवास फर्किएका थिए। बालुवाटार छाड्नुअघि कार्कीले दुर्गा सुवेदीलाई 'शीतल निवास नजाने?' भनेर सोधेकी थिइन्।
शीतल निवासमा नयाँ प्रधानमन्त्रीको शपथ समारोहको तयारी चलिरहेको थियो। बिरामीबाट भएर भर्खरै तंग्रिएका सुवेदीले शीतल निवास जाने इच्छा देखाएनन्।
'म किन जानुपर्यो र। म यहीँबाट घर जान्छु,' उनले भने।
उनी पत्नी कार्की पुग्नुभन्दा केही बेरअघि मात्रै घर पुगेका थिए। घर पुग्नासाथ पप्पीसँग उनको भेट भयो।
पप्पीका आँखाले भने कार्कीलाई खोजिरहेका रहेछन्।
'अब मेरो यहाँको साथी यही नै हो,' कुकुर सुम्सुम्याउँदै कार्कीले भनिन्।
घरमा अहिले कार्की दम्पती मात्र छन्। एक मात्र सन्तान छोरा अध्ययनको सिलसिलामा बेलायतमा छन्। कार्की दम्पती पनि बेलायत आउजाउ गरिरहन्छन्।
'अहिले त उहाँहरू दुई जना मात्रै घरमा हुनुहुन्छ। उहाँले केही समय घरको रेखदेख गर्छु भन्नुभएको छ,' रावलले भने।
वृद्धपथमा हिँडिरहेका यी दुई दम्पतीको साथी अब 'पपी' नै बनेको छ।
-1746009348.jpg)
