नेकपा एमालेका कार्यवाहक अध्यक्ष रामबहादुर थापा ‘बादल’ ले विशेष महाधिवेशन पक्षधर तीन जना नेतालाई पार्टी केन्द्रीय कार्यालय च्यासल बोलाएर हस्ताक्षर अभियान तत्काल रोक्न आग्रह गरेका छन्।
बादलले विशेष महाधिवेशनका लागि राष्ट्रिय महाधिवेशन प्रतिनिधि परिषद् सदस्यहरूको हस्ताक्षरका लागि अगुवाइ गरिरहेका बुद्धिजीवी परिषद् अध्यक्ष गजेन्द्र थपलिया, राष्ट्रिय युवा संघका उपमहासचिव उपेन्द्र शाही र अनेरास्ववियुका उपमहासचिव कमल जोशीलाई मंगलबार केन्द्रीय कार्यालयमा बोलाएर गतिविधि रोक्न भनेका हुन्।
‘अहिले पार्टी प्रतिनिधि सभा निर्वाचनको गम्भीर समीक्षा गरी ठोस निष्कर्षको चरणमा छ। अहिलेको अवस्थामा विशेष महाधिवेशनको माग गर्दै हस्ताक्षर गराउँदा पार्टी झन् संकटमा पर्छ, त्यसलाई रोकौं,’ बादलको भनाइ उद्धृत गर्दै छलफलमा सहभागी एक नेताले सेतोपाटीसँग भने।
विशेष महाधिवेशनका लागि हस्ताक्षरको अगुवाइ गरिरहेका तीनै जना नेताले अभियान रोक्न इन्कार गरेका थिए।
विशेष महाधिवेशन पक्षले बरू केन्द्रीय कमिटी बैठक बोलाएर विशेष महाधिवेशन घोषणा गर्नुको विकल्प नरहेको बताएका थिए।
‘निर्वाचन सम्पन्न भएको एक महिना बितिसकेको छ। तर पार्टीले समीक्षा गर्ने, कमजोरीको विवेचना गर्ने भन्दा पनि झन् गल्ती गर्ने दिशामा गइरहेको छ। सुहाङ नेम्वाङलाई जसरी दलको नेता बन्ने प्रक्रियामै रोक लगाइयो, यसले शीर्ष नेताहरूको सोच देखाउँछ,’ छलफलमा सहभागी ती नेताले भने, ‘केन्द्रीय कमिटी बोलाएर विशेष महाधिवेशनमा जाऔं। पुनर्गठनको बाटो तय गरौं। केन्द्रीय कमिटीले त्यो तत्परता नदेखाउने हो भने राष्ट्रिय महाधिवेशन प्रतिनिधि परिषद्ले नै विशेष महाधिवेशन तोक्छ।’
आजको छलफल नोकझोकमै टुंगिएको अर्का नेताले बताए। कार्यवाहक अध्यक्ष बादलले ‘तपाईंहरूको विद्रोह पार्टीले दबाउन पनि सक्छ’ भन्दै दबाब दिन खोजेको ती नेताले बताए।
‘तपाईंहरूको यो विद्रोह नै हो। तर पार्टीले चाह्यो भने दबाउन सक्छ, स्वीकार्न पनि सक्ला,’ बादलको भनाइ उद्धृत गर्दै ती नेताले भने, ‘अहिले हस्ताक्षर अभियान स्थगन गरेर पार्टीलाई सहयोग गर्नुस्।’
अभियानप्रति रूष्ट देखिएका महासचिव शंकर पोखरेलले कुराकानी सकिएपछि फोटोसमेत खिच्न नमानेर आफूहरूलाई अपमान गरेको ती नेताले बताए।
‘हामीले पार्टी आन्दोलनलाई रूपान्तरणको दिशामा लैजान खोजेका हौं। पार्टी आन्दोलन पुनर्गठन गर्न खोजेका हौं। समीक्षा गरौं भन्दा महासचिवले नेतृत्वलाई जनताले स्वीकारेनन् भनेको होइन किन हामीसँग फोटो खिच्नुपर्योसम्म भन्नुभयो। नोकझोकमै कुरा टुंगियो,’ ती नेताले भने, ‘उहाँहरूको आजको व्यवहारले सुहाङ नेम्वाङको समर्थक र प्रस्तावक बस्न खोज्ने सांसदलाई कति दबाब दिनुभयो होला, हामी अनुमान गर्न सक्छौं।’
आजको छलफलमा पार्टीका कार्यवाहक अध्यक्ष बादल, महासचिव पोखरेल र उपाध्यक्ष विष्णु पौडेल पनि सहभागी थिए। उपाध्यक्ष पौडेलले ‘समय कम छ, छोटोमा कुराकानी राख्नुस्’ भने पनि उनीसँग पनि नोकझोक परेको ती नेताले बताए।
‘उहाँहरू कुरा सुन्न नै तयार हुनुहुन्न। रूपान्तरणको आवाज अझै निषेध नै गर्न सकिन्छ। रूपान्तरणको आवाज दबाउन पनि सकिन्छ भन्ने सोचमै हुनुहुन्छजस्तो पायौं। हामीले वैधानिक बाटो समातेका छौं। जहिले हामी संख्या पुर्याउन सक्छौं, त्यहिले हामी प्रक्रियामा जान्छौं। हाम्रो अभियान रोकिँदैन,’ ती नेताको भनाइ छ।
एमालेको विधानको धारा ७३ मा विशेष महाधिवेशनको व्यवस्था छ।
विशेष महाधिवेशन माग गर्नका लागि पछिल्लो महाधिवेशनमा भाग लिएका ५१ प्रतिशतको हस्ताक्षर चाहिन्छ।
महाधिवेशनमा भाग लिएका प्रतिनिधिहरूलाई एमालेले राष्ट्रिय महाधिवेशन प्रतिनिधि परिषदमा बदल्ने गर्छ। एमालेमा यस्तो परिषदको आकार २२६३ सदस्यीय छ।
विशेष महाधिवेशनका लागि यसैको ५१ प्रतिशत आवश्यक पर्छ।
-1746009348.jpg)
