प्रधानमन्त्री बालेन शाहको निर्देशनमा आज शनिबार बिहान ६ बजेदेखि नै काठमाडौंको थापाथलीस्थित सुकुम्बासी बस्ती खाली गराउन थालिएको छ।
बिहान केही घन्टा सामान निकाल्न समय दिइएको थियो। त्यसैबीच यहाँका धेरै बसोबासीले आफ्नो सामान सारेका थिए। अन्यत्र बसोबासको विकल्प खोजेकाहरू रातारात बसाइ सरिसकेका थिए। विकल्प नहुनेहरूले भने सामान पोको पारेर सडकमै असरल्ल राखेका देखिन्थे।
सुकुम्बासी बस्ती खाली गर्न जनपद, सशस्त्र र काठमाडौं महानगरका नगर प्रहरीहरू ठूलो संख्या परिचालन गरिएको थियो। उनीहरूले सुकुम्बासीहरूका सामान सार्न मद्दत गरिरहेका देखिन्थे।
सबै सुकुम्बासीले सामान सारिसकेपछि डोजर, एक्स्काभेटर लगायतका उपकरण प्रयोग गरेर यहाँका झुपडी र अन्य भौतिक संरचना भत्काउन सुरू गरिएको छ। बिहान १० बजेसम्म करिब ७० प्रतिशत भौतिक संरचनारू भत्काइसकेको महानगर नगर प्रहरी प्रमुख विष्णुप्रसाद जोशीले जानकारी दिए।
उनका अनुसार झुपडी लगायतका भौतिक संरचना हटाउन सुरूमा दुइटा डोजर परिचालन गरिएको थियो। पछि तीनवटा डोजर थपियो। सामानहरू उठाएर लैजान दुईवटा क्रेन पनि तयारी अवस्थामा राखिएका छन्।
उनीहरूलाई थापाथलीबाट दशरथ रंगशालाको 'होल्डिङ सेन्टर' लैजाने योजना रहेकामा अहिलेसम्म एक जना आमा र दुई जना बच्चा मात्र गएका छन्।
रौतहट घर भएकी मनीषा यादव र उनका ५ र ३ वर्षका बच्चालाई रंगशाला लगेर राखिएको नगर प्रहरी निरीक्षक वसन्त आचार्यले जानकारी दिए।
'उहाँले पनि म धेरै बेर बस्दिनँ भन्नुभएको छ। मेरो श्रीमान कोठा खोज्न जानुभएको छ। कोठा पाएपछि सर्छु भन्नुभएको छ,' आचार्यले भने।
नगर प्रहरी प्रमुख जोशीका अनुसार धेरैले कोठा खोजेर आफू आफू नै व्यवस्थापन गरिसकेका छन्। बस्ने ठाउँ छैन भनेर महानगरको सम्पर्कमा कोही आएका छैनन्।
थापाथलीका सुकुम्बासीहरूलाई सुरूमा रंगशाला लगेर राख्ने र त्यहाँबाट सुन्दरीघाटमा लैजाने तयारी छ। तर सुन्दरीघाट जान कोही पनि सम्पर्कमा नआएको उनले बताए।
-1746513231.jpg)
-1746009348.jpg)
