सिनामंगलको सुकुम्बासी बस्तीबाट शनिबार विस्थापित भएका कुमार कुम्हर आफ्नो परिवारको नाम र विवरण टिपाउन आइतबार दिउँसो रंगशाला आइपुगेका थिए।
काभ्रेको मन्डन देउपुर नगरपालिकाका उनी शनिबार डोजरले घर भत्काएपछि सपरिवार गुह्रेशवरी स्कुलमा आश्रय लिएर बसेको बताउँछन्।
डर र अन्यौलका कारण शनिबारै रंगशाला आउन नसकेको उनको भनाइ छ।
'नेपालभरि कहीँ पनि मेरो जग्गा-जमिन छैन। भएको एउटा आश्रय पनि भत्काइदिएपछि के गर्ने, कसो गर्ने अलमलमा हिजो नै यहाँ आउन सकिनँ,' उनले सेतोपाटीसँग भने, 'आज चाहिँ यहाँ नाम टिपाउन आइनँ भने सुकुम्बासी सूचीबाटै बाहिरिन्छु कि भनेर आएँ।'
कुमारले आफू र पत्नीसहित दुई जना सन्तानको नाम र विवरण टिपएका छन्। उनका तीन र चार वर्षका दुई सन्तान छन्।
रंगशाला आएर नाम टिपाए पनि उनी सरकारले प्रबन्ध गर्ने 'होल्डिङ' सेन्टरमा बस्न चाहँदैनन्। दैनिक मजदुरी गर्नुपर्ने भएकाले हरेक दिन होल्डिङ सेन्टरबाट काममा धाउन गाह्रो पर्ने उनको भनाइ छ।
'दुई-चार दिन स्कुलमै बस्छु, त्यसपछि नजिकै पायक पर्ने ठाउँमा आफै प्रबन्ध गर्छु,' उनले भने, 'पछि सुकुम्बासीका रूपमा कतै बस्न पाइयो भने त्यहीँ जानुपर्ला।'
कुमार मात्र होइन, प्रधानमन्त्री बालेन शाहले सुरक्षा बल प्रयोग गरी थापाथली, गैरीगाउँ, सिनामंगल, मनोहरा लगायतका सुकुम्बासी बस्ती भत्काएपछि डरले लाखापाखा लागेका थुप्रै सुकुम्बासी अहिले धमाधम सम्पर्कमा आउन थालेका छन्।
शनिबार बिहानैबाट सुकुम्बासी बस्ती खाली गर्न प्रहरीले माइकिङ गरेपछि उनीहरू डर र अन्यौलका कारण सामानसहित विभिन्न ठाउँमा सरेका थिए। अहिले उनीहरू पनि सुकुम्बासीका रूपमा विवरण टिपाउन त्रिपुरेश्वरस्थित दशरथ रंगशाला आइरहेका छन्।
आफै आवास र खानपिन प्रबन्ध गर्न नसकेका परिवारको विवरण संकलन गर्न सरकारले दशरथ रंगशालामा हेल्प डेस्क राखेको छ। त्यहाँ विवरण टिपेपछि विभिन्न पाँचवटा 'होल्डिङ सेन्टर' मा उनीहरूको बस्ने व्यवस्था गरिएको छ।
आइतबार राति ७ बजेसम्म रंगशाला आएर नाम र विवरण टिपाउने परिवार संख्या ५४७ पुगेको छ। यहाँ अधिकारसम्पन्न बागमती सभ्यता एकीकृत विकास समिति र उपत्यका विकास प्राधिकरणले सुकुम्बासी परिवारको नाम टिपिरहेका छन्।
प्राधिकरणमा नाम टिपाउनेको संख्या २१७ जना छ। तीमध्ये थापाथलीका ७२ परिवार, शान्तिनगरका ६२ परिवार, गैह्रीगाउँका ४४ परिवार र मनोहराका ३९ परिवार छन्।
त्यस्तै, उपत्यका विकास प्राधिकरणमा ३३० परिवारले नाम टिपाएका छन्। तीमध्ये २१८ परिवार कहाँबाट आएको भनी रूजु भइसकेको छ। रूजु भएकामध्ये थापाथलीका ६६ परिवार, गैह्रीगाउँका ४३ परिवार, सिनामंगलका २१ परिवार, शान्तिनगरका ५८ परिवार र मनोहराका ३० परिवार छन्।
समिति र प्राधिकरणले रंगशाला पश्चिमतर्फको कुनामा छुट्टाछुट्टै डेक्स राखेर फारम भराइरहेका छन्।
रंगशालामा छुट्टै डेस्क राखेर उनीहरूको स्वास्थ्य परीक्षण गर्ने र खाना खुवाउने काम पनि भइरहेको छ। यसको समन्वय काठमाडौं महानगरपालिकाले गरिरहेको छ।
-1746009348.jpg)
