प्रधानमन्त्री बालेन शाहले काठमाडौंका सुकुम्बासी बस्तीमा डोजर चलाइएको विषयमा संसदमा जबाफ दिएका छन्।
आइतबार प्रतिनिधि सभा बैठकमा श्रम संस्कृति पार्टीका सांसद आरेन राईले सोधेको प्रश्नमा जबाफ दिँदै प्रधानमन्त्री बालेनले काठमाडौंका सुकुम्बासी बस्ती सरकारले प्राथमिकता दिएर हटाएको विषयमा जबाफ दिएका हुन्।
उनले काठमाडौं उपत्यकाका सुकुम्बासी बस्ती खोला किनारमा रहेकाले जोखिमपूर्ण हुने कारण हटाइएको बताए।
'तपाईंहरूले हेर्दाखेरि खेदाएको जस्तो देखिए पनि उहाँहरूलाई सार्ने काम गरेका हौं,' उनले भने।
यसको व्यवस्थापनबारे उनले ४ वर्ष अगाडिदेखि आफू स्थानीय सरकारमा हुँदा संघ सरकारलाई भनेको बताए।
'त्यहाँबाट स्थानान्तरण गरी होल्डिङ सेन्टरमा राखेर जो सहि सुकुम्बासी हुनुहुन्छ। जसको देशभरि कतै पनि एक धुर जग्गा पनि छैन। उहाँहरूलाई चाहिँ छैन जग्गाको व्यवस्थापन नेपाल सरकारको व्यवस्था गर्नुपर्छ भनेको थिएँ,' उनले भने।
वास्तविक सुकुम्बासीले जग्गा पाउनुपर्छ भन्नेबारे सरकार र पार्टीको मान्यता रहेको उनले बताए।
'त्यो उहाँहरूले पाउनुपर्छ। त्यो सरकार र हाम्रो पार्टीको मान्यता हो,' उनले भने।
विगतमा बाढी आउँदा पनि उनीहरूको घर डुबानमा पर्ने र उनीहरूको स्वास्थ्य अवस्था पनि एकदम नाजुक थियो।
'सफाइको अवस्था, शौचालयको व्यवस्था, त्यसको निकासा सिधै खोलामा थियो। उहाँहरूबाटै निस्केको फोहोरको दुर्गन्धले उहाँहरू नै बिरामी परिराख्नुभएको थियो। त्यसले गर्दा उहाँहरू बिरामी पनि परिराख्नुभएको थियो। खोला फोहोर भइरहेको थियो। सबैभन्दा ठूलो कुरा चाहिँ उहाँहरूको ज्यान जोखिममा थियो,' उनले भने, 'ज्यान जोखिमबाट जोगाउने काम गरेको हो नेपाल सरकारले।'
जग्गा व्यवस्थापनका लागि समय लाग्ने पनि उनले बताए।
'जहाँसम्म उहाँहरूलाई जग्गा व्यवस्थापनको कुरा छ त्यसका निम्ति भूमिसम्बन्धी समिति पनि बनिसकेको छ। हाम्रो मन्त्रालयले काम गरिरहेको छ। दुइटा तीनटा मन्त्रालयले यो विषयमा काम गरिरहेको छ। यसका लागि जति समय लाग्छ त्यति समय लाग्छ। हतार गरेर हुँदैन,' उनले भने।
-1780214601.jpeg)
