म्याग्दीबाट निर्वाचित प्रतिनिधि सभाका स्वतन्त्र सांसद महावीर पुनलाई प्रधानमन्त्री बालेन शाहको सिफारिसमा राष्ट्रपतिले आज विज्ञान, प्रविधि तथा नवप्रवर्तन मन्त्री नियुक्त गरी शपथ गराएका छन्।
राष्ट्रपति भवन शीतल निवासमा आज अपराह्न पुन र गृहमन्त्री सुधन गुरूङको शपथ भएको हो।
शपथपछि पत्रकारहरूले नवनियुक्त विज्ञान, प्रविधि तथा नवप्रवर्तन मन्त्री महावीर पुनलाई केही प्रश्न सोधेका थिए।
मन्त्री पुनले सुरूमै मन्त्री बनेकोमा बधाई दिनेहरूलाई धन्यवाद दिए। त्यसपछि उनले धेरै प्रश्न नसोध्न पत्रकारहरूलाई आग्रह गरेका थिए तर पत्रकारहरूले एकपछि अर्को प्रश्न सोधे।
दोस्रो पटक मन्त्री बनेको विषयमा पत्रकारहरूले प्रश्न राख्दा महावीर पुनले आफू दोस्रो पटक पासोमा परेको प्रतिक्रिया दिए। उनी सुशीला कार्की नेतृत्वको सरकारमा शिक्षा मन्त्री बने पनि केही महिनापछि राजीनामा दिएर चुनाव लड्न गएका थिए।
‘मन्त्री भएकोमा बधाई दिने सबैलाई धन्यवाद छ। म मन्त्री बनेको होइन, दोस्रो पटक पासोमा परेको हो है,’ मन्त्री पुनले भने, ‘एउटालाई पासो थाप्छु भनेको आफै पासोमा परेँ। अब पासोमा परेपछि फुत्कन पाइन्न।’
उनले आफूमा मन्त्री हुने चाहना नहुँदा नहुँदै दोस्रो पटक मन्त्री हुनुपरेको बताए।
‘म मन्त्री हुन चाहना गरेको होइन, उहिले देखिको नवप्रवर्तन मन्त्रीको चाहनाचाहिँ राखेको हो, यो नभईकन देश विकास हुँदैन भनेर एकोहोरो काग कराएजस्तो कराउँदै आएको थिएँ, आज पासोमा परेँ,’ उनले भने, ‘बुद्धिले भ्याएजति काम गर्ने हो। भोलि के छ प्लान भनेर नसोध्नु। बजेट १ प्रतिशत परेको छ, त्यो टीको लगाउन पुग्छ दसैंमा राम्रोसँग। विज्ञान प्रविधि विकास कति हुन्छ भनेर देखाउन १० वर्ष लाग्छ।’
-1758537163-1774403852.jpg)
