राष्ट्रिय स्वतन्त्र पार्टीको प्रथम महाधिवेशनअन्तर्गत आज बन्द सत्र र निर्वाचन कार्यक्रमको तालिका छ।
बिहान ९ बजे बन्द सत्र सुरू गर्ने तालिका रहे पनि साढे २ घन्टा ढिला हुँदासमेत बन्द सत्र सुरू हुन सकेको छैन।
यसका चार कारण छन्।
पहिलो, प्रतिनिधि चयन टुंगिसकेको छैन। उजुरी पनि परेको छ।
मधेस प्रदेशबाट को-को महाधिवेशन प्रतिनिधि रहने भन्ने यकिन भइसकेको छैन। महाधिवेशन उद्घाटन गरेपछि मात्रै प्रतिनिधि टुंगो लगाउने काम गरिए पनि त्यसमा विवाद देखिएको छ। एक नेताले सेतोपाटीलाई दिएको जानकारीअनुसार मधेस प्रदेशमा प्रतिनिधिको विषय अझै टुंगिसकेको छैन, विवादित छ। मधेस प्रदेशका प्रतिनिधिविरूद्ध १०० भन्दा बढी उजुरी परेको छ।
दोस्रो, प्रतिनिधि कार्ड वितरण गरिएको छैन।
रास्वपा महाधिवेशन प्रतिनिधिहरूलाई प्रतिनिधि कार्ड उपलब्ध गराउन ढिलाइ भएको छ। उक्त कार्डबिना बन्द सत्र हलभित्र प्रवेश गर्न पाइँदैन।
तेस्रो, सांसदहरू अन्यौलमा देखिन्छन्।
रास्वपामा १८२ जना सांसद छन्। महधिवेशन आयोजक समितिमा नरहेका सांसदहरू स्वत: महाधिवेशन प्रतिनिधि रहने विधानको व्यवस्था छ। तर कतिपय सांसदहरूको नाम सूचीमा छैन। ती सांसदहरू अहिले सूचीमा नाम राख्न दाबी विरोध गरिरहेका छन्।
चौथो कारण, व्यवस्थापकीय पक्षसँग जोडिएको छ। बिहानी खाजा समयमै हुन सकेन। यस्ता कारणले बन्दसत्र प्रभावित बनेको महामन्त्री कबिन्द्र बुर्लाकोटीले जानकारी दिए।
बन्द सत्र हलमा सभापति रवि लामिछाने, प्रधानमन्त्रीसमेत रहेका वरिष्ठ नेता बालेन शाह पनि आइसकेका छैनन्। अरू पदाधिकारी पनि खासै देखिएका छैनन्।
तर कार्यकर्ताहरू भने अधिकांश आइसकेका छन्। बन्द सत्र सुरू भएको छैन, विभिन्न प्रस्तावहरू पेस भएर छलफल हुनै बाँकी छ तर नेताहरू भने भोट मागिरहेको अवस्थामा भेटिन्छन्।
रास्वपामा सभापति र केन्द्रीय सदस्यका लागि चुनाव हुन्छ। सम्भवत: सभापतिमा रवि लामिछाने नै दोहोरिने देखिएको छ। सभापति पदमा उम्मेदवारी दिन ५१ जना समर्थक र एक जना प्रस्तावक र ५१ हजार शुल्क लाग्छ। यति धेरै समर्थक जुटाउन जोकोही नेतालाई मुश्किल पर्ने प्रतिनिधिहरू बताउँछन्।
यस्तै प्रतिनिधि संख्याको एक चौथाइ जति प्रतिनिधि केन्द्रीय सदस्यका आकांक्षी छन्। प्रतिनिधि करिब चार हजार छन्।
‘जो भेट्यो त्यो नेता केन्द्रीय सदस्यमा उठेको छु भनेर भोट मागिरहेका छन्,’ एक प्रतिनिधिले भने। पदाधिकारी हुन पनि केन्द्रीय सदस्य बन्नुपर्ने भएकोले धेरै नेताहरू केन्द्रीय सदस्य पदमा उम्मेदवार छन्।
केन्द्रीय सदस्यमा उम्मेदवारी दिन एक प्रस्तावक र २१ समर्थक तथा २१ हजार शुल्क आवश्यक पर्छ। कतिपय केन्द्रीय सदस्यका आकांक्षीलाई २१ समर्थक र एक प्रस्तावक जुटाउन धौ-धौ देखिएको ती प्रतिनिधिले बताए।
रास्वपामा ९९ केन्द्रीय सदस्य पदमा चुनाव हुनेछ भने बाँकी मनोनीत हो। केन्द्रीय समिति १५८ सदस्यीय हुन्छ, प्रदेश सभापतिहरू पदेन केन्द्रीय सदस्य हुन्छन्।
-1782108146.jpeg)
