नेकपा एमालेका प्रचारप्रसार विभाग प्रमुख निरज आचार्यले अर्थमन्त्री स्वर्णिम वाग्लेले भारत भ्रमणका क्रममा नेपालको राष्ट्रवादबारे दिएको अभिव्यक्तिमाथि प्रश्न उठाएका छन्।
भारतविरोधी भावनासँग जोडिएको नेपालको राष्ट्रवादको पुरानो भाष्य समाप्त भएको वाग्लेको अभिव्यक्तिको राजनीतिक सन्देश र कूटनीतिक औचित्यमाथि प्रश्न उठाउँदै आचार्यले राष्ट्रिय स्वाधीनता, सार्वभौमसत्ता र राष्ट्रिय हितको रक्षा पनि राष्ट्रवादका अभिन्न अंग भएको बताएका छन्।
नेपाल र भारतबीचको सम्बन्ध पारस्परिक सम्मान, विश्वास र साझा हितका आधारमा अघि बढ्नुपर्ने उनको भनाइ छ।
‘भारतसँगको सम्बन्धलाई सुदृढ बनाउने नाममा राष्ट्रिय हित र स्वाभिमानसँग सम्बन्धित प्रश्नलाई गौण बनाउनु उचित हुँदैन,’ आचार्यले सामाजिक सन्जाल फेसबुकमा धारणा सार्वजनिक गर्दै भनेका छन्, ‘मित्रराष्ट्रसँग असहमति राख्दैमा सम्बन्ध बिग्रन्छ भन्ने सोच र सम्बन्ध सुधार्ने नाममा सबै असहमतिलाई पन्छ्याएर “तुम शरणम्” गर्ने धारणा दुवै अतिवादी सोच हुन्।’
भारतसँग व्यापार, पारवहन, ऊर्जा, लगानी र कनेक्टिभिटीका क्षेत्रमा सहकार्य आवश्यक रहेको उल्लेख गर्दै उनले सीमा विवादलगायत द्विपक्षीय सरोकारका विषयमा नेपालको अडान स्पष्ट रूपमा प्रस्तुत गर्नुपर्ने बताएका छन्।
