राष्ट्रिय प्रजातन्त्र पार्टी (राप्रपा) का पूर्वअध्यक्ष कमल थापा सहितका नेताहरू जिल्ला-जिल्लामा जाने भएका छन्।
थापाका अनुसार पार्टी संगठन सुदृढीकरण, आसन्न स्थानीय तह निर्वाचन र समसामयिक राजनीतिक अवस्थाबारे छलफल गर्न विभिन्न जिल्लाको भ्रमणमा जाने कार्यक्रम तय भएको छ।
राप्रपाका पूर्वअध्यक्षहरू थापा र प्रकाशचन्द्र लोहनी तथा नेता विक्रम पाण्डे पार्टीका नेता तथा कार्यकर्तासँग बृहत् अन्तर्क्रिया गर्न जिल्ला दौडाहामा निस्कन लागेका हुन्।
उनीहरू मधेस र कोशी प्रदेशका विभिन्न जिल्ला पुग्नेछन्। कात्तिक ११ गते उनीहरू पर्सा पुग्नेछन्। साथै कात्तिक १६ गते कार्यक्रम झापामा हुनेछ।
राप्रपाको केन्द्रीय महाधिवेशन मंसिरमा हुनेछ। त्यसअघि राप्रपा नेताहरू जिल्ला दौडाहामा जान लागेका हुन्।
राप्रपा नेताहरूले सम्बन्धित जिल्लाका पार्टी नेता तथा कार्यकर्तालाई अन्तर्क्रियामा सहभागी हुन अनुरोध गरेका छन्।
