अख्तियार दुरुपयोग अनुसन्धान आयोगले अर्काको नाममा झुट्टा उजुरी दिएको ठहर गर्दै एक व्यक्तिलाई जरिवाना गरेको छ।
नेपाल प्रहरीका डिआइजीको नाम जोडेर फर्जी उजुरी दर्ता गराउने रूकुम (पश्चिम) आठबिसकोट नगरपालिका–५ का दिपक पुन मगरलाई आयोगले २ हजार रूपैयाँ जरिवाना गरेको हो।
दिपक पुन मगरले एबी राई (आङबाबु राई) को नाम र दस्तखत प्रयोग गरी आयोगमा झुट्टा उजुरी दर्ता गराएका थिए।
प्रहरीको डिआईजी पदको दुरुपयोग गरी सहकारीको ऋण र मुद्दा मिलाइदिने भन्दै रकम मागिएको र धम्की दिइएको व्यहोरा सो उजुरीमा उल्लेख गरेको अख्तियारका प्रवक्ता सुरेश न्यौपानेले जानकारी दिए।
उनका अनुसार उजुरी अनुसन्धानको क्रममा उजुरीकर्ता भनिएका आङबाबु राईले आफूले उजुरी नदिएको र त्यसमा भएको हस्ताक्षरसमेत आफ्नो नभएको भनी सनाखत गरेका थिए।
त्यसपछि गरिएको बयानमा दिपक पुन मगरले नै आङबाबु राईको नामबाट उक्त उजुरी दिएको कुरा स्वीकार गरेका थिए।
अरूलाई दुःख तथा हैरानी दिने बद्नियतले झुट्टा उजुरी दिएको तथ्य पुष्टि भएपछि भ्रष्टाचार निवारण ऐन, २०४८ को दफा ४९ लगायतका प्रचलित कानुन बमोजिम दिपक पुन मगरलाई २ हजार रूपैयाँ जरिवाना गरिएको प्रवक्ता न्यौपानेले जानकारी दिए।
.JPG)
-1746513231.jpg)
