आफूलाई 'मुख छाडेकै' भरमा प्रहरीले समातेको विषयमा स्ट्रिमर झापालिस् भनिने मनिष पाण्डेले प्रधानमन्त्री बालेन्द्र शाहलाई मेसेज गरेका छन्।
र्यापर समेत रहेका झापालिसले र्यापर भिटेनलाई प्रहरीले पक्राउ गर्दा बालेनले लेखेको कुरा सम्झाउँदै मेसेज गरेका हुन्।
'ओ बालेन दाइ के हो? मुख छाडेको भरमा त्यसरी हुल्नु त भएन नी। त्यत्रो भिटेनको बारेमा, र्यापमा मुख छाड्यो भनेर जेल हाल्दा फ्रि भिटेन, मेबी वान डे नेपाल गभर्मेन्ट विल अन्डरस्ट्यान्ड हिपहप भन्ने मान्छे अहिले आएर यस्तो बेहोरा चाहि ओभर बिल्ला हो। भएन है भएन,' उनले मेसेजमा लेखेका छन्।
आफूले प्रधानमन्त्री शाहलाई मेसेज गरेकोबारे उनले आफ्नो इन्स्टाग्राम स्टोरीमा स्क्रिनसट राखेका हुन्।
यसरी पक्राउ गरिएको विषयमा उनले गृहमन्त्री सुधन गुरूङलाई समेत सम्झाउन भनेका छन्।
झापालिसलाई प्रहरीले असोज २६ गते राति प्रहरीले पक्राउ गरिएको थियो। पक्राउ गरेर राति नै उनलाई सामाजिक सञ्जालमा अपशब्द नबोल्न भन्दै छाडिएको थियो।
पछि उनले आफ्नो स्ट्रिमिङमा पनि प्रहरीले हतकडी समेत लगाएर हिरासतमा राखेको र पछि निकालिएको बताएका थिए। उनले यसरी आफूलाई अपशब्द बोलेकै कारणले पक्राउ गरेको विषयमा आपत्ति जनाउँदै आएका छन्।
झापालिसले युट्युबसहित विभिन्न प्लेटफर्ममा स्ट्रिमिङ गर्छन्। उनको युट्युबमा ४ लाख ६३ हजार सब्स्क्राइबर्स छन्। उनका र्याप गीतहरू पनि चर्चित छन्।
लामो समयसम्म अमेरिका बसेका उनी पछिल्लो समय झापाबाटै स्ट्रिमिङ गर्दै आएका छन्।
