अमेरिकी अर्बपति इलन मस्कले आगामी वर्ष अमेरिकाका प्रत्येक बालबालिकालाई आफ्नो कम्पनी स्पेसएक्सको एक–एक सेयर दिने घोषणा गरेका छन्।
कृत्रिम बुद्धिमत्ता (एआई) कम्पनी एन्थ्रोपिकले आइतबार सामाजिक सञ्जालमा आफ्नो सेयरको पाँच प्रतिशत नयाँ ‘पब्लिक बेनिफिट’ कोषमा दिने घोषणा गरेको थियो। त्यसको प्रतिक्रियामा मस्कले सेयर सिधै सर्वसाधारणलाई दिनुपर्ने सुझाव दिएका थिए।
सोमबार मस्कले सामाजिक सञ्जालमा अमेरिकाका प्रत्येक बालबालिकालाई स्पेसएक्सको एक सेयर दिने घोषणा गरेका हुन्।
स्पेसएक्सले मंगलबार त्रैमासिक वित्तीय विवरण सार्वजनिक गर्नेछ। कम्पनीको सेयर मूल्य शुक्रबार प्रतिकित्ता १४६.०३ अमेरिकी डलरमा बन्द भएको थियो।
अमेरिकामा १८ वर्षमुनिका करिब सात करोड ३० लाख बालबालिका छन्। मस्कको घोषणाअनुसार प्रत्येक बालबालिकालाई एक सेयर दिइएमा उक्त योजनाको मूल्य करिब १० अर्ब ६६ करोड अमेरिकी डलर हुनेछ।
यद्यपि, मस्कले सेयर वितरण कसरी गरिनेछ भन्नेबारे थप विवरण दिएका छैनन्। उनले आफ्नो सामाजिक सञ्जाल पोस्टमा ‘यो धेरैमध्ये पहिलो हुनेछ’ पनि लेखेका छन्।
एन्थ्रोपिकले भने आफूले प्रतिबद्धता जनाएको सेयर कम्पनीभित्रै स्थापना गरिने नयाँ संस्था ‘एन्थ्रोपिक पब्लिक बेनिफिट फन्ड’ मा जाने जनाएको छ। सेयरको मूल्य बढ्दै जाँदा उक्त कोषको मूल्य पनि बढ्न सक्नेछ।
मस्क र एन्थ्रोपिकका घोषणाहरू अमेरिकामा कृत्रिम बुद्धिमत्ताको विकासप्रति चिन्ता बढिरहेका बेला आएका हुन्।
मस्कको घोषणामा अमेरिकी राष्ट्रपति डोनाल्ड ट्रम्पले धन्यवाद दिएका छन्।
'हाम्रा महान् मित्र इलन मस्कलाई लाखौँ अमेरिकी बालबालिकाका लागि ट्रम्प अकाउन्टमार्फत स्पेसएक्सको सेयर उपलब्ध गराउने उहाँको उदारताका लागि धेरै–धेरै धन्यवाद! हामीले ट्रम्प अकाउन्ट स्थापना गर्दा परिकल्पना गरेको कुरा ठ्याक्कै यही हो। निजी क्षेत्रका उत्कृष्ट कम्पनी, एलन मस्क र अन्य धेरैलाई एकै ठाउँमा ल्याएर हाम्रा बालबालिकामा लगानी गर्ने र उनीहरूलाई अमेरिकी सपनाको एउटा हिस्सा प्रदान गर्ने। हाम्रा बालबालिका नै निःसन्देह हाम्रो सबैभन्दा ठूलो र महत्त्वपूर्ण सम्पत्ति हुन्। धन्यवाद, इलन,' उनले लेखेका छन्।
एसोसिएटेड प्रेस–एनओआरसी सेन्टर फर पब्लिक अफेयर्स रिसर्चले गरेको नयाँ सर्वेक्षणअनुसार ६४ प्रतिशत अमेरिकी वयस्कले एआईको विकास ‘अत्यधिक तीव्र गतिमा’ भइरहेको बताएका छन्। २७ प्रतिशतले यसको विकासको गति उपयुक्त रहेको र आठ प्रतिशतले भने निकै सुस्त रहेको बताएका छन्।
गत महिना एन्थ्रोपिकका डारियो अमोडेई, ओपनएआईका साम अल्टम्यान, स्पेसएक्सएआईका मस्कलगायत प्रविधि क्षेत्रका प्रमुख व्यक्तिहरूले एआईको विकासको गति कम गर्नुपर्ने बताएका थिए।
एन्थ्रोपिकका एक अनुसन्धानकर्ताले प्रविधिले मानवतामाथि पार्न सक्ने जोखिमबारे गम्भीर चेतावनी दिँदै राजीनामा दिएपछि यस्तो सहमति बनेको थियो।
तर घरेलु तथा अन्तर्राष्ट्रिय प्रतिस्पर्धा, नाफा कमाउने व्यावसायिक उद्देश्य र अमेरिकी राष्ट्रपति डोनाल्ड ट्रम्पको विरोधलगायत कारणले एआईको विकासलाई समन्वयात्मक रूपमा नियन्त्रित गतिमा अघि बढाउने प्रयासमा चुनौती देखिएको छ।
यसैबीच, मस्क यस वर्ष हुने अमेरिकी मध्यावधि निर्वाचनमा सबैभन्दा ठूलो ज्ञात दाताका रूपमा देखिएका छन्। रिपब्लिकन पार्टीले संसद्मा आफ्नो बहुमत जोगाउन सघाउने उद्देश्यले उनले जुलाईयता २७ करोड ६० लाख अमेरिकी डलरभन्दा बढी रकम खर्च गरिसकेको समाचारमा उल्लेख छ।
