सप्तकोशी नदीमा यात्रु बोकेको मोटरबोट पल्टिँदा पाँच वर्षीया बालिकासहित तीन जनाको मृत्यु भएको छ।
आइतबार दिउँसो दुई बजेतिर भोजपुरको कोप्चेबाट सुनसरीको बराहक्षेत्रतर्फ आउँदै गरेको मोटरबोट धनकुटा, उदयपुर र भोजपुरको संगमस्थल त्रिवेणी नजिक दुर्घटनामा परेको हो।
जिल्ला प्रहरी कार्यालय सुनसरीका अनुसार दुर्घटनामा मृत्यु हुनेमा पाँच वर्षीया बालिका, ३५ वर्षीया महिला र ४० वर्षीय पुरुष छन्। उनीहरूको पहिचान खुल्न सकेको छैन।
तीनै जनाको शव चतरा अस्पतालमा राखिएको प्रहरीले जनाएको छ।
मोटरबोटका चालक सुमन मगर भने पौडिएर बाहिर निस्किएका थिए। प्रहरीले उनलाई नियन्त्रणमा लिएको छ।
प्रहरीका अनुसार ११ जनाको टिकट काटिएको देखिए पनि बोटमा १६ जना सवार रहेको बताइएको छ।
चालकले प्रहरीलाई बताएअनुसार ११ यात्रु र बाँकी चालकका आफन्त बोटमा सवार थिए। दुर्घटनास्थल धनकुटातर्फ पर्ने भए पनि भौगोलिक कठिनाइका कारण त्यहाँबाट उद्धार टोली पुग्न समय लाग्ने भएपछि सुनसरीको बराहक्षेत्रबाट प्रहरी टोली परिचालन गरिएको थियो।
नेपाल प्रहरीसँगै सशस्त्र प्रहरीको टोली पनि उद्धारमा खटिएको थियो। दुर्घटनाको कारणबारे प्रहरीले अनुसन्धान गरिरहेको छ।
*शीर्षक सच्याइएको।
