फिल्म 'जनै हराएको बाहुनः सम्बन्धका धागाहरू' को प्रदर्शन मिति घोषणा भएको छ। निर्माणपक्षले फिल्मको कथा झल्काउने एक टिजर पोस्टर ल्याउँदै भदौ ६ गतेलाई रिलिज मिति तय गरेको हो।
सार्वजनिक पोस्टरमा एकजना व्यक्ति अस्ताउँदो सूर्यको दृश्य अगाडि उभिएका छन्। सूर्यभन्दा माथि हवाइजहाज उडिरहेको छ भने व्यक्तिको छेउमा छायाँमा ठूलो घरजस्तो देखिन्छ।
सांकेतिक दृश्यमा निलो रंग तल्लो भागमा र माथि गोधुली साँझ छ। सांकेतिक दृश्यमा देखिएको व्यक्ति चिनिँदैन।
अस्ताउँदो सूर्य र ठूलो हवाइजहाज उडेको दृश्यले रोजगारीका लागि विदेश जान लागेको देखाउन खोजिएको हो कि भन्ने अनुमान लगाउन सकिन्छ। किनकि नेपालमा ठूलो हवाइजहाजको दृश्य वैदेशिक रोजगारीको बिम्व हो।
'जनै हराएको बाहुनः सम्बन्धका धागाहरू' अहिले छायांकन सकिएर पोस्ट प्रोडक्सनमा छ।
हिमाल न्यौपानेको निर्देशन रहेको फिल्मले आमाको खोसिएको खुसी फर्काउन सम्पत्ति कमाउन घरबाट सहर पस्ने छोरोको कथा भन्ने जनाइएको छ। फिल्मले आमा र छोराबीचको भावनात्मक कथा बोल्ने निर्माणपक्षको भनाइ छ।
यो फिल्मको एसोसियट निर्देशकमा 'प्रेमगीत ३' अभिनेता मनिष राउत छन्।
फिल्ममा विजय बराल, केकी अधिकारी, मिरूना मगर, गौरव पहाडी, सुशांक मैनालीलगायत कलाकारहरूको मुख्य भूमिका छ।
त्यस्तै, भोलाराज सापकोटा, रेअर राई, भावना खपांगी मगर, रुपेश लामा, सुमन थापालागायतको समेत अभिनय छ।
फिल्मको कथा, पटकथा र संवाद भानुभक्त ढकालले लेखेका हुन्। पेपरक्लिप प्रोडक्सनको ब्यानरमा निर्माण भएको फिल्मका निर्माता कमल न्यौपाने र विमल न्यौपाने हुन्। सह–निर्मातामा आरके मानन्धर, रूपेश लामा, सिआर बस्नेत, फिलिप डिसी, नारायण तिमिल्सिना र चुडामणि सिवाकोटी छन्।
सुपरहिट फिल्म 'पूर्णबहादुरको सारंगी' पछि विजय बरालले 'जनै हराएको बाहुन' मा मुख्य भूमिकामा अभिनय गरेका हुन्।
