अभिनेता अनमोल केसीलाई दर्शकले एक वर्षदेखि नयाँ फिल्ममा देख्न पाएका छैनन्।
गतवर्ष जेठमा रिलिज 'फर्की फर्की' पछि उनको फिल्म प्रदर्शनमा आएको छैन।
अनमोलले फिल्म 'जेरी अनटप' को छायांकन सकेका छन्। सुयोग गुरूङको निर्देशन रहेको यो फिल्ममा अनमोलसहित केदार घिमिरे, आँचल शर्मा र जसिता गुरूङको शीर्ष अभिनय छ।
अब अनमोलले बुवा भुवन केसीको निर्देशनमा बन्ने फिल्म 'बाटुलो जुन' मा काम गर्दैछन्। यो फिल्ममा अनमोलको अपोजिटमा चर्चित टिकटकर तथा मोडल प्रिन्सी खतिवडा देखिनेछिन्।
त्यस्तै, अनमोलले यसैसाता फिल्म 'ए मेरो हजुर ५' साइन गरेका छन्। 'बाटुलो जुन' को छायांकनपछि यो फिल्म फ्लोरमा जानेछ।
झरना थापाको निर्देशनमा बन्ने 'ए मेरो हजुर ५' मा अनमोल र सुहाना थापाको शीर्ष अभिनय रहनेछ। 'ए मेरो हजुर' को यसअघिका दुई शृंखलामा पनि अनमोल र सुहानाले जोडी बाँधेका थिए। ती दुवै फिल्म सफल भएका थिए।
अनमोलले आफूले लामो समयको विश्रामपश्चात एउटा नयाँ अध्यायको सुरूआत गर्न लागेको बताएका छन्।
उनले फेसबुकमा लेखेका छन्, – 'जेरी अन टप, बाटुलो जुन र ए मेरो हजुर ५ मार्फत नेपाली चलचित्र उद्योगमा नयाँ जोशका साथ उपस्थित हुन लागेको खुसीको कुरा सुनाउन पाउँदा निकै उत्साहित र हर्षित छु।'
'होस्टेल' बाट उदाएका अनमोल युवापुस्तामाझ चर्चित अभिनेता हुन्।
