चलचित्र विकास बोर्डले नेपाली फिल्मको पछिल्लो आधिकारिक बक्स अफिस कमाइ सार्वजनिक गरेको छ।
बोर्डले मंसिर १३ गते शनिबारसम्म प्रदर्शन भएका फिल्महरूको कमाइको विवरण सोमबार दिउँसो सार्वजनिक गरेको हो। जसमा 'जेरी अन टप' र त्यसयता प्रदर्शनमा आएकामध्ये दर्शकहरूले रूचाएका फिल्महरू छन्।
बोर्डले सार्वजनिक गरेको विवरण अनुसार नीर शाह अभिनीत फिल्म 'परान' को कमाइ १६ करोड नाघेको छ। गत शनिबार (मंसिर १३) सम्म फिल्मले सिनेपा बक्सअफिसमा १६ करोड १६ लाख ७७ हजार ५५८ रूपैयाँ कमाइ गरेको हो।
दीपक आचार्य 'काकु' निर्देशित यो फिल्म कात्तिक १४ गते रिलिज भएको थियो। 'परान' २०८२ सालमा हालसम्मकै सर्वाधिक कमाउने नेपाली फिल्म समेत बनेको छ। बोर्डका अनुसार यस अवधिसम्म फिल्मको ५ लाख ६९ हजार ७५४ वटा टिकट बिक्री भएका छन्।
'जारी २' र 'मन बिनाको धन' को व्यापार कति?
दयाहाङ राई र मिरूना मगरको मुख्य भूमिका रहेको फिल्म 'जारी २ः सङ अफ च्याब्रुङ' ले ६ करोड १९ लाख ३५ हजार ८५३ रूपैयाँ कमाइ गरेको छ।
उपेन्द्र सुब्बा निर्देशित यो फिल्मको गत शनिबारसम्म २ लाख ६ हजार २३९ वटा टिकट बिक्री भएको तथ्यांकमा उल्लेख छ।
त्यस्तै, टंक बुढाथोकी निर्देशित फिल्म 'मन बिनाको धन’ ले पनि बक्स अफिसमा सुखद् व्यापार गरेको छ। अशोक दर्जीको शीर्ष भूमिका रहेको फिल्मले मंसिर १३ गतेसम्म ३ करोड ७४ लाख ९१ हजार ४६१ रूपैयाँ ग्रस कमाएको छ।
फिल्मको १ लाख ४३ हजार ३३५ वटा टिकट बिक्री भएको विकास बोर्डले जनाएको छ। 'जारी २' र 'मन बिनाको धन' एकसाथ कात्तिक २१ गतेदेखि प्रदर्शनमा आएका हुन्।
५१ दिने बाटोमा 'जेरी अन टप'
चलचित्र विकास बोर्डले अनमोल केसीको शीर्ष अभिनय रहेको फिल्म 'जेरी अन टप' को कमाइको पछिल्लो विवरण समेत सार्वजनिक गरेको छ।
सुयोग गुरूङ निर्देशित फिल्मको कमाइ १२ करोड २३ लाख ५२ हजार ३१५ रूपैयाँ पुगेको छ।
अनमोल केसी, जसिता गुरूङ र आँचल शर्मा अभिनीत फिल्मले पनि मंसिर १३ गतेसम्म उक्त कमाइ गरेको हो।
असोज ३१ गतेदेखि प्रदर्शनमा आएको फिल्मको ३ लाख ९० हजार ९०४ वटा टिकट बिक्री भएका छन्। 'जेरी अन टप' प्रदर्शनको ५१ औं दिन मनाउने तरखरमा छ।
हेर्नुहोस् चलचित्र विकास बोर्डले सार्वजनिक गरेको विवरण
-1746009348.jpg)
