पछिल्लो समय कलाकारहरूको नाम दुरूपयोग गर्दै ठगी गर्ने क्रम बढेको छ। अभिनेत्रीहरू केकी अधिकारी, स्वस्तिमा खड्का, अभिनेता आकाश श्रेष्ठ लगायतले आफ्नो नाम र तस्बिर दुरूपयोग गर्दै पैसा मागिएको गुनासो गरेका छन्।
आफूहरूको नाम र तस्बिर दुरूपयोग गर्दै ह्वाट्स एप र भाइबरबाट पैसा मागिएको उनीहरूको भनाइ छ।
सामाजिक सञ्जालमा पैसा मागिएको च्याटको स्क्रिन सटसहित केकी, स्वस्तिमा र आकाशले सामाजिक सञ्जालमा पोस्ट गरेका छन्। उनीहरूले यस प्रकारका म्यासेजहरूमा नझुक्किन अनुरोध गरेका छन्।
स्वस्तिमाले फेसबुकमा लेखेकी छिन्,'मेरो नामको दुरूप्रयोग गर्दै ह्वाट्स एप, भाइबरमा मेरा साथीहरूलाई पैसा माग्दै गरेको भेटिएको हुनाले त्यस्ता मेसेजहरूमा नझुक्किनुहुन सबैमा जानकारी गराउन चाहन्छु।'
त्यस्तै, केकीले फेसबुकमा लेखेकी छिन्,‘मेरो नाम र तस्बिरको दुरूपयोग गरि भाइबर/ह्वाट्स एपमार्फत पैसा मागिरहेको भन्ने जानकारी प्राप्त भएको छ। यो कार्य कानुनी रूपमा पनि दण्डनीय छ। र, सम्पूर्णलाई सजग रहन हार्दिक अनुरोध गर्दछु।'
अभिनेता आकाश श्रेष्ठले आर्थिक सहयोगको माग गरिएको म्यासेजमा कुनै प्रतिक्रिया नदिन अनुरोध गरेका छन्।
उनले लेखेका छन्, 'प्रविधिको दुरूपयोगका घटनाहरू हामी सबैलाई विदितै छन्। हाल मेरो नाम र तस्बिर प्रयोग गरी भाइबर/ह्वाट्स एप नम्बरबाट मानिसहरूलाई सम्पर्क गर्दै आर्थिक सहयोगको माग गरिएको जानकारी प्राप्त भएको छ। यदि कसैलाई यस्ता किसिमका सन्देशहरू प्राप्त भएमा कृपया सतर्क रहनुहोला र कुनै प्रतिक्रिया नदिनुहोला। किनकि ती पूर्ण रूपमा भ्रामक तथा नक्कली हुन्।'
अन्य केही कलाकारहरूले समेत नाम र तस्बिर दुरूपयोग गरिएको गुनासो गरेका छन्।
-1746009348.jpg)
