फिल्म 'बलिदान' रिलिजपछि मिडियामा नदेखिएका समीर भट्ट यतिबेला भारतको मुम्बईमा रहेर अभिनय र एक्सनसम्बन्धि प्रशिक्षण लिइरहेका छन्।
अभिनय र एक्सनमा थप निखार ल्याउन उनी मुम्बईमा प्रशिक्षणमा व्यस्त बनेका हुन्। '१२ गाउँ-२' को तयारीका लागि मुम्बईमा केन्द्रित उनी छायांकन सुरू हुनुअघि मात्र नेपाल फर्किनेछन्।
समीरले मुम्बईको चर्चित स्टुडिओमा दुई महिनादेखि प्रशिक्षण लिइरहेका हुन्। अभिनेता विराज भट्टले फिल्म '१२ गाउँ-२' आगामी दसैंमा प्रदर्शनमा आउने यसअघि घोषणा गरिसकेका छन्। '१२ गाउँ' फिल्मबाट विराजले छोरा समीरलाई डेब्यु गराएका थिए।
स्रोतका अनुसार, '१२ गाउँ २' को स्क्रिप्ट लेखन अन्तिम चरणमा पुगेको छ। चैत वा वैशाखदेखि छायांकन थाल्ने तयारी निर्माण पक्षको छ। विराज भने यतिबेला फिल्म 'राम नाम सत्य' को छायांकनमा व्यस्त छन्। समीर '१२ गाउँ २' को छायांकन सुरू हुने समयमा मात्र नेपाल फर्किने बताइएको छ।
उनी यसअघि पनि करिब १० वर्ष मुम्बईमा बसेर अभिनय, मार्सल आर्टस्, जिम र जिम्न्यास्टिकको तालिम लिएका थिए।
लामो समयको तयारीपछि उनले '१२ गाउँ' बाट डेब्यु गरेका थिए। पहिलो फिल्म नै व्यापारिक हिसाबले सुपरहिट बन्यो भने समीर एकाएक चर्चामा आएका थिए। त्यसपछि समीरले दोस्रो फिल्मका रूपमा 'बलिदान' मा अभिनय गरे। गत दसैंमा प्रदर्शनमा आएको फिल्मले अपेक्षित व्यापार नगरे पनि करिब ६ करोड हाराहारी कमाइ गरेको थियो।
'१२ गाउँ २' समीरको तेस्रो फिल्म हुनेछ।
विराज निकट स्रोतले भन्यो, '१२ गाउँ २ कै लागि भन्दा पनि अभिनय र एक्सनमा अझै पोख्तता ल्याउनका लागि समीरले मेहनत गरिरहेका हुन्। १२ गाउँमा उनको भूमिका केही थोरै भयो भन्ने दर्शकको गुनासो थियो। यसपटक उनको स्क्रिन स्पेस लामो हुने र १२ गाउँमा भन्दा फरक देख्न पाइने छ।'
-1756794700.JPG)
-1746009348.jpg)
