कलाकार दीपकराज गिरीको आगामी फिल्म पनि राजनीतिक कथामा निर्माण हुने भएको छ।
फिल्म लेखक, निर्माता तथा अभिनेता गिरीले सामाजिक सञ्जालमा एक सांकेतिक पोस्ट गर्दै आगामी फिल्मको कथावस्तुबारे संकेत गरेका हुन्।
उनले आफू निर्वाचनमा उठ्ने उम्मेदवारको भूमिकामा देखिन लागेको जानकारी दिएका हुन्। यद्यपि, दीपकले फिल्मको नाम भने खुलाएका छैनन्। उनको पोस्टबाट आगामी फिल्म राजनीतिक कथावस्तुमा आधारिक हुने स्पष्ट संकेत मिल्छ।
उनले लेखेअनुसार फागुन महिनादेखि फिल्मको छायांकन सुरू हुनेछ। पोस्टमा उनले विभिन्न राजनीतिक दलसँग आफूलाई जोडेर हुने चर्चालाई व्यंगात्मक शैलीमा प्रस्तुत गरेका छन्। उनका अनुसार केहीले दीपकलाई नेपाली कांग्रेस नजिकको मान्ने गरेका छन् भने कसैले एमाले निकट मान्छन्। यस्तै, एमाले कार्यकर्ताहरूले भने आफूलाई राजावादी वा माओवादी भन्ने गरेको उल्लेख गरेका छन्।
दीपकले लेखेका छन्, 'आखिर म पनि निर्वाचनमा उठ्ने नै भएँ। तर कुन पार्टीबाट?’ आफूलाई पछिल्लो समय रास्वपासँग जोडेर आरोप लाग्ने उल्लेख गर्दै उनले लेखेका छन्, ‘अब यस्तोमा म उठ्ने पार्टी कुन होला त? हो, यही फागुन महिनामा नै सुरू हुने अन्यायविरूद्ध निर्वाचनमा होमिएको एक उम्मेदवारको कथासहित मेरो आफ्नै फिल्ममा अभिनय गर्दैछु। म उठ्ने त्यसमै हो। मैले जानेको पनि यही नै हो। जे जान्दछु गर्ने पनि त्यही नै हो।'
समर्थनको सन्दर्भमा उनी लेख्छन्, 'जहाँसम्म समर्थनको कुरा छ। योपल्ट मेरो समर्थन परिवर्तनकारी पक्षतिर नै रहनेछ।'
दीपकराजको सामाजिक सञ्जाल पोस्टले उनको आगामी फिल्म राजनीतिक-सामाजिक व्यंग्य, निर्वाचन र समसामयिक विषयवस्तुमा हुने संकेत मिल्छ। फिल्मबारे उनले अरू केही जानकारी खुलाएका छैनन्।
दीपकराजले यसअघि पनि आफ्ना फिल्ममा राजनीतिक कथावस्तु समेटदै आएका थिए।
-1746009348.jpg)
