बलिउड अभिनेता सलमान खानको नयाँ फिल्म 'ब्याटल अफ गलवान' लाई चीनको सरकारी मिडियाले आलोचना गरेको छ।
बिबिसीका अनुसार चीनको चर्चित सरकारी दैनिक ग्लोबल टाइम्सले एक लेख प्रकाशित गर्दै उक्त फिल्मले 'तथ्य तोडमोड गरेर प्रस्तुत गरेको' आरोप लगाएको हो।
सन् २०२६ अप्रिल १७ मा रिलिज हुने भनिएको 'ब्याटल अफ गलवान' फिल्म सन् २०२० मा लद्दाखको गलवान घाटीमा भारत–चीन सैनिकबीच भएको भिडन्तमा केन्द्रित बताइन्छ।
सलमान खान र चित्रांगदा सिंह यस फिल्ममा मुख्य भूमिकामा छन् भने निर्देशन अपूर्व लाखियाले गरेका छन्।
डिसेम्बर २७ मा सलमान खानको जन्मदिनका अवसरमा फिल्मको टिजर सार्वजनिक गरिएको थियो।
सन् २०२० मे महिनामा पूर्वी लद्दाखको पेंगोंग त्सो ताल क्षेत्र (नर्थ बैंक) मा दुवै पक्षका सैनिकबीच झडप भएको थियो।
त्यसपछि जुन १५ मा फेरि गलवान घाटीमा भिडन्त भयो। भारतीय सेनाले जुन १६ मा दिएको बयानमा २० जना भारतीय सैनिकको मृत्यु भएको पुष्टि गरियो।
चीनले भने त्यो बेला आफ्ना सैनिकको मृत्युबारे केही बताएन, तर २०२१ फेब्रुअरीमा चार सैनिकलाई मरणोपरान्त सम्मान दिएको घोषणा गरियो।
ग्लोबल टाइम्सले के भन्यो?
ग्लोबल टाइम्समा प्रकाशित लेखमा भनिएको छ, 'सलमान खान चीनमा बजरंगी भाइजानका लिड अभिनेता भनेर चिनिन्छन्। साधारण कथामा आधारित, अजेय पात्र खेल्ने शैलीलाई लिएर यहाँ उनको धेरैजसो मजाक उडाइन्छ।'
'यस फिल्ममा सलमानले कर्नल बिक्कुमाला सन्तोष बाबुको भूमिकामा छन्। भारतीय मिडियाले दाबी गरेको थियो, उनले २०२० को गलवान भिडन्तमा महत्त्वपूर्ण भूमिका खेलेका थिए, जसले बलिउडको ध्यान तान्यो।'
एक चिनियाँ सैन्य विज्ञतर्फ उद्धृत गर्दै लेख भन्छ, 'बलिउड फिल्महरू प्रायः भावनात्मक नाटक र मनोरञ्जनमा आधारित हुन्छन्, तर कुनै पनि बढाइचढाइ गरिएको प्रस्तुतिले इतिहास फेरि लेख्न सक्दैन। चीनको सार्वभौम क्षेत्रको सुरक्षामा पिएलएको संकल्प हल्लाउन सक्दैन।'
चिनियाँ सुरक्षा विज्ञ सोङ जोङपिङले भने, 'राष्ट्रवादी भावना जगाउन भारतले चलचित्र, विशेषगरी बलिउडलाई प्रयोग गर्नु अनौठो होइन, यसले उनीहरूको राजनीतिक–सांस्कृतिक परम्परा देखाउँछ।'
चीनका अन्तर्राष्ट्रिय अध्ययन संस्थानका एसिया–प्रशान्त विभाग प्रमुख लेन चियानशुएले 'फिल्मको विषयवस्तु र समय छानिने तरिका सही नभएको' बताए।
'अहिले चीन–भारत सम्बन्धमा केही सहजता आएको छ, यस्तो बेला एकतर्फी कथा प्रस्तुत गर्नु वैमनस्य बढाउने काम हो,' उनले भने।
ग्लोबल टाइम्सको लेखबारे भारतीय विदेश मन्त्रालयले अहिलेसम्म प्रतिक्रिया दिएको छैन।
भारत सरकारले कर्नल सन्तोष बाबुलाई २०२१ जनवरीमा मरणोपरान्त महावीर चक्र प्रदान गरेको थियो। उनी १६औं बिहार रेजिमेन्टका टोली नायक थिए र 'अपरेसन स्नो लेपर्ड' अन्तर्गत अवलोकन पोस्ट स्थापना गर्ने क्रममा मृत्यु भएको बताइएको थियो।
भारतमा यो फिल्मको टिजर सार्वजनिक भएको तीन दिनमै युट्युबमा दुई करोडभन्दा बढी भ्यूज भइसकेका छन्।
-1746009348.jpg)
