सौगात मल्लको मुख्य अभिनय रहेको फिल्म 'भाइरल गोर्खे' को ट्रेलर सार्वजनिक भएको छ।
निगम श्रेष्ठको कथा तथा निर्देशनमा तयार फिल्मको ट्रेलरले कथावस्तुबारे छोटकरीमा प्रकाश पार्छ।
ट्रेलर शीर्ष अभिनेता सौगातको पात्र वरपर घुमेको छ। उनको पात्रले सामाजिक सञ्जालमा भाइरल बन्न गर्ने संघर्ष र अनौठा हर्कतको कथा फिल्ममा समेटिएको छ। यो फिल्मले सामाजिक सञ्जालमा भाइरल बन्ने हुने प्रवृत्तिमाथि व्यंग्य र प्रश्न गर्छ।
फिल्ममा सौगातको जोडी अभिनेत्री सृष्टि श्रेष्ठसँग बाँधिएको छ।
यसअघि 'छड्के', 'लालपूर्जा' र 'छड्के २' जस्ता फिल्म निर्देशन गरिसकेका निगम श्रेष्ठले 'भाइरल गोर्खे' ले आफ्नो निर्देशकीय क्षमतालाई पूर्ण प्रस्तुत गर्नुका साथै दर्शकलाई एउटा सुन्दर फिल्म देखाउने चाहना पूरा गर्ने विश्वास व्यक्त गर्छन्।
समसामयिक र घरघरको विषय भएकाले दर्शकले मन पराउने विश्वास रहेको उनी बताउँछन्।
एके ब्रदर कम्पनी, द जिएमआई एकेडेमी र निर्भाना फिल्म स्कुलको ब्यानरमा निर्माण भएको फिल्ममा सौगात र सृष्टिसँगै बुद्धि तामाङ, लक्ष्मी गिरी, राजाराम पौडेल, ऋषि धमला, रवि भुजेल र मिस पवीको अभिनय छ।
अमित श्रेष्ठ, विशाल ताम्राकार, महेश लामिछाने र केवल जंग कुँवर निर्माता रहेको फिल्मको सह-निर्माता निर्भाना फिल्म स्कुल, भुवन अधिकारी र निखिल पौडेल हुन्।
अमर महर्जनको छायांकन रहेको फिल्म लमजुङको भुजुङ गाउँ, गोरखा र चितवनमा खिचिएको हो।
'भाइरल गोर्खे' को वितरक सुनिल मानन्धर, द्वन्द निर्देशक श्री श्रेष्ठ र एडिटर बन्दे प्रसाद, रवि चौधरी र भीम विश्वकर्मा हुन। फिल्म आगामी माघ १ गतेबाट प्रदर्शनमा आउने तालिका तय छ।
-1746009348.jpg)
