कमेडी टेलिभिजन शो 'कमेडी दरबार' को टिमले अस्ट्रेलिया टुर गर्ने भएको छ।
उक्त टुरका लागि आयोजक, फिल्म निर्देशक तथा निर्माता शोभित बस्नेत र कमेडी दरबारका निर्देशक विक्की अग्रवालबीच कागजी सम्झौता भएको छ।
निर्देशक बस्नेतले कमेडी दरबारको टिमसँग अस्ट्रेलिया टुरका लागि कागजी सम्झौता भएको बताए। उनले भने, 'अस्ट्रेलियामा रहेका नेपालीहरूलाई मनोरञ्जन गराउने उद्धेश्यले टुर गर्न लागिएको हो। टुरका लागि तयारी गरिसकेका छौं।'
उनका अनुसार टुरमा 'कमेडी दरबार' का अधिकांश कलाकारहरूको सहभागिता रहनेछ। आगामी फेब्रुअरी महिनाको मध्यतिरबाट सुरू हुने यो टुर करिब एक महिनासम्म सञ्चालन हुनेछ। टुरअन्तर्गत सिड्नी, मेलबर्न, ब्रिसबेन, पर्थ, एडिलेड, डार्बिन, न्युक्यासल लगायत करिब ८ वटा सहरमा कार्यक्रम आयोजना गरिने निर्देशक बस्नेतले बताए।
कार्यक्रमको तयारीका लागि शोभित बस्नेत छिट्टै अस्ट्रेलिया प्रस्थान गर्ने तयारीमा छन्। यस कार्यक्रमको प्रस्तुतकर्ता पाल्पा इन्टरटेनमेन्ट रहेको छ भने टुर आयोजकका रूपमा थ्रीकेजी इभेन्ट र पाल्पा इन्टरटेनमेन्ट रहेको छ।
यसैगरी, पाल्पा इन्टरटेनमेन्ट र शोभित बस्नेतले संयुक्त रूपमा अब प्रत्येक दुई महिनामा अस्ट्रेलियामा नियमित कार्यक्रम आयोजना गर्ने योजना पनि सार्वजनिक गरेका छन्।
-1746009348.jpg)
